Байден сайлов пойгасидан чиқмоқчи эмас ва ғалаба ваъда қилмоқда

82 ёшга қараб кетаётган президент Ню Йорк ҳамда Ню Жерсидаги бир неча фандрайзинг тадбирларига ташриф буюрган. Сайлов кампаниями учун маблағ йиғишдан ташқари Жо Байден CNN каналида ўтказилган президентлик дебатида содир бўлган воқеалар ҳақидаги тасаввурларни ўзгартиришга ҳаракат қилди.

Тадбирлардан бирида чиқиш қиларкан, Байден шуни тан олди: «Бу менинг энг яхши оқшомим эмасди, аммо Трампда ҳам».

«Сизга ваъда бераманки, биз бу сайловларда ғолиб бўламиз», — деган у.

Шундан кейин АҚШ президенти дебатлардан кейин демократларда шубҳалар пайдо бўлганини тўғри тушунишини айтиб, курашишни тўхтатмасликка чақирди.

Дебат чоғида у шу қадар ишончсиз кўринган ва яхши гапира олмагандики, баҳслашув якунланиши билан либерал шарҳловчилар ва политтехнологлар бирин-кетин унинг ўрнига бошқа номзодни илгари суриш таклифи билан чиқа бошлади. Улардан аксарининг фикрича, агар Байден иккинчи муддатга номзод бўлишдан қайтмаа, бу Доналд Трампнинг муқаррар ғалабасини англатиши мумкин.

Вакиллар палатасининг демократлардан бўлган собиқ спикери Нэнси Пелоси BBC билан суҳбатда Байденнинг дебатдаги чиқиши «унча яхши бўлмагани»ни айтган, палатанинг жамоатчилик билан алоқалар бўйича собиқ директори Кейт Бедингфилднинг бу чиқишдан «ҳафсалани пир бўлган».

Байден жамоаси вакиллари дебатлар кўнгилдагидек ўтмаганини инкор этмайди, аммо у ўз жойини бошқа номзодга бўшатиб бермаслигини таъкидлаган.

Демократларнинг сайловолди штаби раҳбари Женифер О’Малли Диллон дебатдан кейин ўтказилган сўровлар «сайловчилар фикри ўзгармагани»ни кўрсатаётганини билдирган.

«Бу ОАВдаги бўрттирилган баҳолар рейтинг вақтинча пасайишига сабаб бўлиши билан боғлиқ илк ҳолат эмас», — деган у.

Ню Жерси губернатори, Демократик партия вакили Фил Мерфи маблағ йиғиш бўйича маросимга ташриф буюрган ва Жо Байденга шундай деган: «Биз 1000 фоизга сиз биланмиз».

Собиқ президент ва Жо Байденнинг яқин дўсти Барак Обама эса ижтимоий тармоқдаги саҳифасида «баъзида ёмон дебатлар ҳам бўлиб туриши» ҳақида ёзган.

«Бу сайловлар — бутун умр оддий одамлар учун курашган инсоннинг фақат ўзи ҳақида қайғурувчи билан курашидир», — дея ёзган Обама.

Дебатдан бир неча соат ўтиб Трамп тарафдорларидан бирига буни ўз кампанияси учун «катта ғалаба» деб ҳисоблашини айтган.

«Жо Байденнинг муаммоси ёшида эмас, — деган 78 ёшли Трамп. — Гап унинг лаёқатсизлигида. У очиқчасига лаёқатсиз».

Байденнинг чиқиши сиёсат билан шуғулланмайдиганларда ҳам ёқимсиз таассурот қолдирган.

Демократларнинг кўп йиллик тарафдори Лори Грегори BBC билан суҳбатда дебатларни шунчаки кузата олмаганини айтган ва шундай савол қўйган: «Наҳотки, бу мамлакатимиз қодир бўлган энг яхшиси?»

Республикачи Кристал Майерс-Барбер эса дебатларни кузатиш оғир бўлгани ва «Трамп жуда ишончли ҳамда президентларга хос кўрингани, Байден эса жуда заиф бўлиб кўрингани»ни айтган.

Либерал тараф бўлган Data for Progress томонидан ўтказилган сўров натижасига кўра, дебатни кузатган ёки у ҳақда ўқиган сайловчиларнинг 62 фоизи унда Трамп ғалаба қилган деб ҳисоблашини билдирган. Фақат 30 фоиз киши Байден ғалабаси ҳақида гапирган.

Бошқа сўровлар пайдо бўлгунига қадар айнан маблағ йиғишда Жо Байден қанчалик қўлловга эгалиги ёки қанчалик йўқотишга учраганини билиб олиш мумкин.

Сайловолди штаби бошлиғи Женифер О’Малли Диллон берган маъумотга кўра, дебат ўтказилган пайшанба куни кечқурундан жума куни кечгача бўлган вақт оралиғида 27 млн доллар йиғишга муваффақ бўлинган.

«Пайшанба куни кечқурун ўтказилган дебатдан кейин камар ичкарисидагиларнинг барчаси Жо Байден ютқазди деб ҳисобламоқда. Аммо иккиланувчи штатлар бўйича маълумотлар бошқа нарсани сўзламоқда», — деган у.

«Камар ичи» — бу америкача ибора бўлиб, биринчи навбатда АҚШ федерал ҳукумати амалдорлари, унинг пудратчилари ва лоббичилари ҳамда уларни ёритувчи оммавий ахборот воситалари учун муҳим бўлган масалалар доирасини англатади. «Камар» деб АҚШ пойтахти Вашингтонни ўраб турувчи I-495 шоссесига айтилади.

«Номзодлар пайшанба кунига қадар ҳам минимал фарқ билан ҳаракатланаётганди ва шундан буён кузатилаётган барча кўрсаткичларга кўра улар ҳали ҳам бир-бирига жуда яқин», — дея қўшимча қилган у.