Россияда 40 йил ичида илк бор Олимпиада намойиш этилмайди

Парижда ўтадиган ёзги олимпиада ўйинларига россиялик спортчиларнинг қўйилмагани сабабли Олимпиада трансляциясини Россиянинг бирорта телеканали ёки стриминг сервиси сотиб олмаган.

Фото: outsideonline.com

Россия ОАВларининг ёзишича, «айни пайтдаги реалликларда Первий» ва «Россия-1» телеканалларида Россия байроғи ва мадҳиясисиз Олимпиадани кўрсатмаслик тўғрисида сиёсий қарор қабул қилинган».

Сўнгги марта Россияда 1984 йили Лос-Анжелесда ўтказилган Олимпиада ўйинлари бойкот туфайли кўрсатилмаган. Сўнгги олимпиадаларни эса Россияда «Матч-ТВ», «Первий канал» ва ВГТРК таркибига кирувчи каналлар намойиш этиб келишган.

2023 йилнинг декабрида Халқаро олимпия қўмитаси Россия Федерацияси ва Беларусдан спортчилар олимпиадада фақат нейтрал статусда — ўз мамлакатлари байроғисиз ва бошқа миллий атрибутикаларсиз қатнашиши лозимлиги тўғрисида қарор чиқарган эди. Бу ҳолда Олимпиадага Россиянинг Украинага босқинини фаол қўллаб-қувватловчи, шунингдек, РФ ва Беларуснинг ҳарбий ёки кучишлатар тузилмалари билан боғлиқ атлетлар қўйилмаган.