Шавкат Мирзиёев Доналд Трампга суиқасд уюштирилганини қоралади

Шавкат Мирзиёев Доналд Трампга сайловолди учрашувда нутқ сўзлаётган чоғида суиқасд уюштирилганини чуқур хавотир билан қабул қилди ва кескин қоралади. Президент унга тез фурсатда соғайиб кетишини тилаган.

Фото: Jeff Swensen / Getty Images

Президент Шавкат Мирзиёев Америка Қўшма Штатларининг собиқ президенти Доналд Трамп Пенсилвания штатида сайловолди учрашувда нутқ сўзлаётган чоғида унинг ҳаётига суиқасд уюштирилгани ҳақидаги хабарни чуқур хавотир билан қабул қилди.

Давлат раҳбари матбуот хизматининг хабарига кўра, президент ушбу зўравонлик ҳаракатини кескин қоралайди ва Доналд Трампга тез фурсатда соғайиб кетишини тилайди.

Эслатиб ўтамиз, Доналд Трамп маҳаллий вақт билан 13 июл куни Пенсилвания штати, Батлер округидаги тарафдорлари иштирокидаги митингда чиқиш қилаётганида суиқасд нишонига айланди. Ўқлардан бири унинг қулоғини ялаб ўтган. Ҳодиса оқибатида бир киши ҳалок бўлиб, икки киши оғир тан жароҳати олган. Ҳужум қилган шахс йўқ қилинган.

Трампнинг матбуот котиби Стивен Чунг унинг аҳволи «яхши»лиги ҳақида маълумот берган.