ОАВ: Маск Трамп кампаниясига миллионлаб доллар ажратади

Америкалик миллиардер Илон Маск ўзининг сайловолди кампанияси доирасида президентликка Республикачилар партиясидан номзод Доналд Трампга кенг кўламли молиявий ёрдам бермоқчи. Бу ҳақда 15 июл, душанба куни The Wall Street Journal (WSJ) хабар берди. Нашр манбаларига кўра, Маск Трамп кампаниясига ойига 45 миллион доллар хайрия қилишга тайёр. 

Маблағлар America PAC сиёсий ҳаракатлар қўмитасига йўналтирилади. Bloomberg аввалроқ Маск ушбу ташкилотга яширинча катта миқдорда хайрия қилгани ҳақида хабар берган эди. America PAC Трампнинг сайловолди штаб-квартираси билан бевосита боғлиқ эмас, аммо АҚШ собиқ президенти учун «саҳна ортида» ишлайди, сайловчиларни ўрганади ва оммавий ахборот воситаларида буюртма қилинган материалларни назорат қилади, дея аниқлик киритди Bloomberg. WSJ маълумотларига кўра, America PAC штатларда сайловчиларни рўйхатга олади ва уларни эрта овоз беришга чақиради.

Қўшма Штатлардаги сиёсий ҳаракатлар қўмитаси президентликка номзодлардан бирининг сайловолди кампаниясига пул хайрия қилувчи донорларни бирлаштирган ташкилотдир. Бундай қўмиталар учун хайрия миқдорида чеклов йўқ. 

Трамп-Маск муносабатлари

Илгари Илон Маск ва Доналд Трамп ўзаро тўқнаш келган бўлса, сўнгги пайтларда улар яқинроқ бўлиб қолди, деб ёзади Bloomberg. Шу тариқа, энди миллиардер собиқ президентга электромобиллар ва криптовалюталар масалалари бўйича маслаҳат беради. «У мени ҳеч қандай сабабсиз чақиради», деди Маск июн ойида Tesla акциядорларининг йиллик йиғилишида Трамп билан давом этаётган муносабатлари ҳақида. Ўз навбатида, Трамп электр транспорт воситаларининг ашаддий мухлиси эканини таъкидлади. «Мен Илоннинг мухлисиман, у Tesla билан ақл бовар қилмайдиган ишни қилмоқда», - дея собиқ президентнинг сўзларини келтиради Reuters. 

13 июл куни Доналд Трамп Пенсилванияда ўз тарафдорлари олдидаги митинг чоғида уюштирилган суиқасдда яраланганидан сўнг, Маск X ижтимоий тармоғида уни қўллаб-қувватлади. Трамп Республикачилар партиясидан президентликка, Жеймс Дэвид Вэнс вице-президентликка номзод этиб кўрсатилганига Маск шундай изоҳ билан муносабат билдирди: «ғолибона эшитиляпти».