Москвадан Самарқандга учган самолётда бомба борлигини айтган безори ушланди

Самолёт қўшимча текширувдан ўтказилганда портловчи моддалар топилмаган. Россиялик безори ички ишлар идорасига олиб кетилган.

Фото: РИА Новости

15 июл куни «Ural Airlines» авиакомпаниясининг Москва-Самарқанд йўналишида парвоз қилган Airbus А320 самолётида фавқулодда ҳодиса юз берди.

«Авиаторщина» телеграм-канали хабарига кўра, 46 ёшли россиялик йўловчи Александр М. самолёт Самарқандга қўнганидан кейин, унинг бортида бомба борлиги ҳақида экипажни ишонтиришга уринган. Манбанинг ёзишича, россиялик «ўзини бошқара олмайдиган ҳолатда бўлган».

Эркак авиакомпания ходимидан самолёт ғилдирагини текшириб кўришни сўраган. Аммо кейинчалик ундан ғилдиракка зинҳор яқинлашмасликни сўраган. Акс ҳолда «болалари унинг жасади бўлакларини териб олишига тўғри келишидан» огоҳлантирган.

Шу билан бирга, Александр ўзбек аскарлари ўзининг телефонини хуфиёна эшитаётганини ва самолётга бомба қўйганини таъкидлай бошлаган. Йўловчини тинчлантиришга уринишлар муваффақиятсиз тугагач, ички ишлар органлари ходимлари чақирилган. Россиялик йўловчи ички ишлар идорасига олиб кетилган, унинг кейинги тақдири маълум эмас.

Самолёт қўшимча текширувдан ўтказилган, бироқ портловчи моддалар топилмаган. Шундан сўнг, самолёт уч соатлик кечикиш билан Москвага қайтиш рейсини амалга оширган.