АҚШ Конгресси қотилни олқишлади — Эрдўған

Туркия президенти Исроил бош вазири Бинямин Нетаняҳунинг АҚШ Конгрессидаги нутқига изоҳ берди.

Фото: Anadolu Agency

АҚШ Конгресси геноцид қотилини қандай олқишлаганига бутун дунё гувоҳ бўлди. Бу ҳақда Туркия президенти Ражаб Тоййиб Эрдўған Исроил бош вазири Бинямин Нетаняҳунинг АҚШ Конгресси Вакиллар палатаси ва Сенати аъзолари олдидаги нутқини шарҳлар экан, айтиб ўтди.

«Инсониятга хизмат қилаётганларни олқишлаш керак. Вакиллар палатаси қарийб 40 минг бола, аёллар ва қарияларни йўқ қилган шахсни олқишлади», деди Туркия раҳбари.

Давлат раҳбари «дунёга демократия ва инсон ҳуқуқлари ҳақида маърузалар ўқиётганлар замонамиз Ҳитлерини заррача уялмасдан улуғлашини» таъкидлади.

Президент Эрдўған АҚШ Конгрессидаги нутқи чоғида «қўлида 150 минг ғазолик қони бўлган қассоб (Нетаняҳу) учун чалинган қарсакларни «ақлдан озиш», деб атади.

Туркия президенти яна бир бор халқаро тизимни ислоҳ қилиш зарурлигини таъкидлади.

«Иккинчи жаҳон урушида ғалаба қозонган давлатларнинг иқтисодий, сиёсий, ҳарбий ва дипломатик манфаатларини ҳимоя қилиш мақсадида шаклланган глобал тизим эскира бошлади», деди сиёсатчи.

Тайёрлаган Сардор Юсупов

#Туркия #Исроил #Ражаб Тоййиб Эрдўған

2023 йил 7 октябр куни Ғазо бўлгасидаги Ҳамас кучлари Исроилга ёппасига ракета зарбалари бериб, чегарадаги аҳоли пунктларини эгаллай бошлади. Бунга жавобан Исроил қўшинлари Ғазо бўлгасига бостириб кирди. Бу сафарги эскалация аввал кузатилмаган даражада кўп қурбонларга олиб келди.