Венесуэла ҳукумати 2 минг намойишчи қўлга олинганини эълон қилди

Венесуэлада мамлакат ҳукмдори Николас Мадуро учинчи бор ғолиб деб эълон қилинган президентлик сайловларидан сўнг расмийлар намойишчиларга нисбатан қаттиқ чоралар кўришини эълон қилди. Намойишлар чоғида 2 минг киши қўлга олинди, деди Мадуро 3 август куни. Ўз тарафдорлари билан гаплашар экан, у ушланганларни Токорон ва Токуйито қаттиқ режимли қамоқхоналарга жўнатишга ваъда берди. «Бу сафар раҳм-шафқат бўлмайди», деб таҳдид қилди у.

Мухолифат намойишларни давом эттиришга ваъда берди

Шу куни мамлакат бўйлаб минглаб одамлар мухолифат етакчиси Мария Корина Мачадо ташаббусига кўра норозилик намойиши ўтказди. У ҳибсга олинишидан қўрқиб сўнгги бир неча кун яшириниб юрганидан сўнг Каракасдаги митингда қатнашди. Венесуэла расмийларининг мухолифлари ҳеч қачон бунчалик кучли бўлмаган, режим эса заиф, дейди у. 

«Биз кўчаларни тарк этмаймиз», деб таъкидлади Мачадо. Митингда президентлик сайловларида мухолифат номзоди Эдмундо Гонсалес Уррутиа иштирок этмаган.

Венесуэлада сайловлар ва намойишлар

Июл ойида бўлиб ўтган президентлик сайловларидан сўнг Венесуэла ҳукумати назорати остидаги Миллий сайлов кенгаши авторитар сиёсатчини сайловчиларнинг 51,2 фоизи қўллаб-қувватлаганини иддао қилиб, мамлакатни 2013 йилдан бери бошқариб келаётган Мадурони расман ғолиб деб тан олди. Бироқ, айрим сайлов округлари бўйича овоз бериш натижалари ҳали эълон қилинмаган. Халқаро кузатувчиларга сайловларда иштирок этишига рухсат берилмади.

Ўз навбатида, мухолифат ўз номзоди Эдмундо Гонсалес Уррутианинг ғалаба қозонганини таъкидламоқда, уларга кўра, у бутун 67 фоизга яқин овоз тўплаган. Мадуронинг рақиблари Венесуэла бўйлаб тўғридан тўғри сайлов участкаларидан олинган бюллетенларнинг 80 фоиздан ортиғини эълон қилди. Сайловдан кейин бутун мамлакат бўйлаб натижалар сохталаштирилишига қарши намойишлар бошланди.

Foro Penal нодавлат ташкилотига кўра, эълон қилинган сайлов натижаларига қарши намойишлар чоғида камида 16 киши ҳалок бўлган. Президент Мадуро Гонсалес ва Мачадони террорчиликда айблаб, уларга 20 йилгача қамоқ жазоси билан таҳдид қилган.

АҚШ мухолифат номзодини сайлов ғолиби деб тан олди

Оқ уй Эдмундо Гонсалес Уррутиани сайлов ғолиби деб тан олди ва бюллетенларни қайта ишлашда «жиддий хатолар»га йўл қўйилганини билдирди. Вашингтонда мамлакат сайлов комиссиялари халқаро ҳамжамият талабига қарамай, сайлов натижаларини тақдим этмагани учун кескин танқид қилинди.