БМТ Исроилга ҳужумда UNRWA ходимлари иштирок этганини тан олди

Бирлашган Миллатлар Ташкилоти (БМТ) БМТнинг Фаластинлик қочқинлар бўйича агентлигининг (ФҚБА, UNRWA) 9 нафар ходими билан ҳамкорликни тўхтатди. Бирлашган Миллатлар Ташкилоти тергови уларнинг ҲАМАС 7 октябр куни Исроилга ҳужумига алоқадор бўлиши мумкинлигини тасдиқлади, деб хабар берди dpa ахборот агентлиги 5 август, душанба куни.

«Тўққиз нафар шахсга нисбатан уларнинг 7 октябрдаги терактларга алоқадор бўлиши мумкинлиги ҳақида хулоса қилиш учун етарли далиллар бор», деди БМТ бош котиби матбуот котиби ўринбосари Фарҳан Ҳақ. Уларнинг иштироки айнан нимадан иборат экани аниқлаштирилмаган. 

Исроил томонидан 7 октябрдаги ҳужумда иштирок этганликда айбланган UNRWA ходимларидан икки нафари вафот этди. Яна тўққиз нафар агентлик ходимига нисбатан далиллар хулоса чиқариш учун етарли бўлмаган, бир ҳолатда эса умуман далил йўқ, деб ёзади Reuters. 

UNRWA ходимлари терроризмга алоқадорликда айбланмоқда 

Январ ойида Исроил разведкаси UNRWA камида 19 нафар ходими 2023 йил октябрида ҲАМАСнинг Исроилга ҳужумида иштирок этганини билдирган эди. Кейинроқ Исроил UNRWA 450 дан ортиқ ходими Ғазодаги гуруҳлар ҳарбий хизматчилари эканини айтди, деб ёзади Reuters. 

UNRWA 1949 йилда ташкил этилган ва ҳозирда 30 000 дан ортиқ ходим ишлайди. Ташкилотнинг белгиланган вазифалари орасида мактаблар, ижтимоий объектлар, тиббиёт марказларини бошқариш, шунингдек, Ғазо секторидаги 5,9 миллион фаластинлик қочқин ўртасида гуманитар ёрдам тарқатиш бор. 

Исроил-Фаластин можароси

7 октябр куни эрталаб ҲАМАСнинг ҳарбий қаноти - «Иззаддин ал-Қассам бригадалари» Исроилга қарши «Ал-Ақсо тўфони» операцияси бошланганини эълон қилди. Ғазо секторидан Исроил томон минглаб ракеталар отилди, қуролли гуруҳлар Исроил аҳоли пунктларига кирди. 

ҲАМАСнинг билдиришича, операция босиб олинган Шарқий Қуддусдаги Ал-Ақсо масжидига бостириб кириш ва исроиллик муҳожирларнинг фаластинликларга нисбатан зўравонлиги кучайиб бораётганига жавобан амалга оширилган. Бунга жавобан Исроил армияси Ғазо секторида ҲАМАСга қарши ўнлаб қирувчи самолётлардан фойдаланган ҳолда «Темир қиличлар» операцияси бошланганини эълон қилди.

Исроил-Фаластин можароси авж олгандан бери 39 мингдан ортиқ фаластинлик ҳалок бўлди. Исроилда қурбонлар сони 1400 дан ошади. Ғазонинг 2,3 миллион аҳолиси Исроилнинг ҳаводан оммавий бомбардимон қилиши ва эксклавнинг тўлиқ блокадаси туфайли озиқ-овқат, сув ва дори-дармонлар танқислигидан азият чекмоқда.