WP: Украина Курск вилоятида камида 247 россиялик аскарни асирга олди

Курск вилоятидаги ҳужум пайтида Украина қуролли кучлари камида 247 нафар россиялик аскарни асирга олди, деб ёзади 25 август, якшанба куни The Washington Post газетаси 130 дан ортиқ фотосурат ва видеоларни таҳлил қилиш натижаларига таяниб. Журналистлар 6 августдан бошлаб Украина ҳарбийлари томонидан эълон қилинган ижтимоий тармоқлардаги видеоларни, шунингдек, The Washington Post фотографининг асирга олинган рус аскарлари сақланаётган қамоқхонада суратга олган кадрларини жамлади ва тасдиқлади. 

Нашр, хусусан, россиялик ҳарбий хизматчиларнинг оммавий асирга олиниши иккита ҳолати ҳақида маълум қилди: камида 29 аскар Курск вилояти Суджа туманидаги Свердликово қишлоғида ва 40 га яқини Суджа чегараси ҳудудида асирга олинган. Шу билан бирга, нашр таъкидлашича, ўрганилган материаллар - қўлга олинган россияликларнинг интернетда чоп этилган барча фотосуратлари ва видеолари эмас. Шу муносабат билан журналистлар қўлга олинганларнинг ҳақиқий сони анча кўп бўлиши мумкинлигини тахмин қилмоқда. 

The Washington Post Украина шимоли-шарқидаги асирлар олиб кетилган қамоқхона бошлиғидан иқтибос келтиради. Унинг сўзларига кўра, сўнгги 10 кун ичида қамоқхонадан 320 нафар россиялик ўтган, уларнинг 80 фоизга яқини муддатли ҳарбий хизматга чақирилганлар. Нашр текширган еттита видеода маҳбуслар ўзларини муддатли ҳарбий хизматчилар деб атаган. Украина ва Россия расмийлари Украина қуролли кучларининг Курск вилоятидаги ҳужуми пайтида қанча рус аскари асирга олингани ҳақида расман хабар бермади. 

Муддатли ҳарбий хизматчиларни «115 га 115» форматида алмашиш

Бир кун олдин Украина ва Россия «115 га 115» форматида ҳарбий асирларни алмашди - бу Украина қуролли кучларининг Курск вилоятига ҳужуми бошланганидан бери биринчи шундай жараён. Иккала томондан ҳам муддатли ҳарбий хизматчилар озод қилинди. Украина мувофиқлаштириш штаби аниқлик киритишича, озод этилганлар орасида ҳарбий денгизчилар, чегарачилар, шунингдек, Мариуполнинг 82 нафар ҳимоячиси бор, улардан 50 нафари «Азовстал»ни ҳимоя қилган.

«Важные истории» нашри «Бизнинг чиқиш» ҳаракати рўйхати ва очиқ маълумотларга асосланиб, алмашишдан кейин камида 19 нафар россиялик ҳарбий хизматчи Украинада асирликда қолаётганини аниқлади. Яна 66 нафари бедарак йўқолган.

Украинанинг Курск вилоятидаги ҳужумидан икки ой олдин Россия президенти Владимир Путин ҳарбий асирлар сонини айтганди: халқаро ОАВ билан мулоқот чоғида у Украинада асирликда 1348 нафар россиялик, Россияда эса 6465 нафар украиналик борлигини билдирди.