Россия ядровий доктринасига ўзгартиришлар тайёрламоқда

Россия сўнгги можаролар ва Украинадаги уруш билан боғлиқ Ғарб ҳаракатлари таҳлили асосида ядровий доктринасини ўзгартиради. Бу ҳақда 1 сентябр, якшанба куни чоп этилган интервюда Россия Федерацияси ташқи ишлар вазири ўринбосари Сергей Рябков ТАСС’га маълум қилди, «Биз бир неча бор таъкидлаганимиздек, иш илғор босқичда ва тузатиш киритишнинг аниқ йўналиши, шу жумладан сўнгги йилларда можаролар ривожланиши тажрибасини ўрганиш ва таҳлил қилиш, ғарбдаги рақибларимизнинг махсус ҳарбий операцияга боғлиқ бўлган кескинлашув курси бўйича барча нарсалар назарда тутилган», - деди вазир ўринбосари.

Унинг тушунтиришича, ҳозирда тегишли ҳужжатни якунлаш жараёни давом этмоқда, аммо уни аниқ саналар ҳақида гапиришга ҳали эрта. «Ушбу ишни якунлаш муддати жуда қийин масала, чунки гап миллий хавфсизлигимизни таъминлашнинг энг муҳим жиҳатлари ҳақида кетаётганини ҳисобга олиш керак», — деди Рябков.

Россия сиёсатчилари доктринага тузатиш киритиш ҳақида тобора кўпроқ гапирмоқда

Вазир ўринбосари Россиянинг ядровий доктринасига режалаштирилган ўзгаришлар ҳақида бир неча бор эълон қилди. Бу бўйича яқинда бошқа россиялик сиёсатчилар ҳам огоҳлантирган. Хусусан, 11 июл куни Россия президенти матбуот котиби Дмитрий Песков ТАСС мухбирининг саволига жавоб берар экан, Россия ядровий доктринасига тузатиш киритиш бўйича мунозаралар олиб борилаётганини тасдиқлади. У эҳтимолий ўзгаришларни НАТО ҳаракатларига жавоб деб атади.

Россия ташқи ишлар вазири Сергей Лавров 27 август куни таъкидлаганидек, америкалик сиёсатчилар Россиянинг «ядро қуролидан фойдаланиш доктринаси ҳақида яхши билишади».

Россия ядровий доктринаси

2020 йилги «Россия Федерациясининг ядровий тийиб туриш соҳасидаги давлат сиёсати асослари»га биноан, агар душман Россияга қарши оммавий қирғин қуроллари турларидан фойдаланса, Россия томони ядро қуролидан фойдаланиши мумкин. Шунингдек, бу Россия ва унинг иттифоқчиларига ҳужум қилиш учун баллистик ракеталар учирилганлиги тўғрисида ишончли маълумот олинган бўлса, Россия Федерациясига оддий қуроллардан фойдаланган ҳолда тажовуз содир бўлган тақдирда, давлатнинг мавжудлиги таҳдид остида бўлганда юз беради.