Беларусда олимлар интернетдан рўйхат бўйича фойдаланишга ўтади

Беларусь Миллий фанлар академияси (МФА) иш жойида интернетдан фойдаланишга рухсат бериладиган ходимлар рўйхатини тузишга қарор қилди. Бу ҳақда кимёгар олим Сергей Бесараб ўзининг Telegram канали орқали маълум қилди.

МФА президиуми раиси Владимир Гусаков кўрсатмасига мувофиқ, «интернет тармоғидан фойдаланиш ҳуқуқига эга ходимлар рўйхати» тайёрланади. Шунингдек, академия ташкилотларидан бирининг ходимлари электромобил учун аккумуляторлар яратиш ишларини фаоллаштиришга сафарбар этилади.

Бундан ташқари, Гусаков академикларга мунтазам Беларусдан ташқарида яшовчи ёки «Беларус Республикаси ва Фанлар академиясига қарши йўналтирилган» фаолият билан шуғулланувчи академикларни унвонидан маҳрум қилиш бўйича низомга қўшимча киритишни топширган.

«XXI асрнинг биринчи чораги, дўстлар. Қаердадир, коинотнинг бошқа бурчагида Брайан Жонсонлар, Илон Маск ва Сем Алтманлар зериккан», — деб ёзади Бесараб.

Беларус ҳукумати интернетдан фойдаланишни чеклашга биринчи марта уринмаяпти. 2020 йил августда оммавий норозилик намойишлари фонида мамлакатда 70 дан ортиқ сайтларга кириш чекланган эди. 2022 йил баҳорда эса мамлакатнинг қатор вилоятлари интернетдан узиб қўйилди. Украина разведкасига кўра, шу орқали Россия ва Беларус махсус хизматлари рус ҳарбий техникаларининг Украина йўналишида ҳаракатланишига оид маълумотлар тарқалишини тўхтатмоқчи бўлган.

2022 йил майда Александр Лукашенко Беларус ОАВ ходимларига мурожаат билан чиқиб, «ахборот уруши» ҳақида гапирган ва «мамлакат тарихи ва маданиятини ўзгартирмоқчи бўлганларга ютқазиб қўймасликни» таъкидлаган эди. Ўтган йилнинг ёзида Лукашенко хориж ОАВ фаолиятини чеклашга хизмат қиладиган қонунни имзолаган эди.