Евроиттифоқ Эрон Россияга ракеталар бергани ҳақидаги маълумотни ўрганмоқда

Европа Иттифоқи «Россияга Эрон баллистик ракеталарини етказиб бериш бўйича иттифоқчилар томонидан тақдим этилган ишончли маълумотларга эга». Бу ҳақда 9 сентябр, душанба куни Европа Иттифоқи ташқи сиёсат хизмати вакили Петер Стано маълум қилди. «Биз Европа Иттифоқига аъзо давлатлар билан биргаликда ушбу маълумотни ўрганмоқдамиз ва агар у тасдиқланса, бу етказиб беришлар Эроннинг Украинага қарши Россия урушини қўллаб-қувватлашида сезиларли моддий эскалация экани ойдинлашади», - дея таъкидлади Стано.

Унинг қўшимча қилишича, Европа Иттифоқи етакчилари аниқ ва якдил позицияга эга. «Европа Иттифоқи тезкор ва халқаро ҳамкорлар билан мувофиқлашган ҳолда жавоб қайтаради, жумладан Эронга қарши янги ва муҳим чекловчи чоралар билан», - дея огоҳлантирди Европа Иттифоқи ташқи сиёсати вакили. 

Эрон ТИВ айбловларни рад этяпти 

Эрон Ташқи ишлар вазирлиги Москвага ракеталар етказиб берилгани ҳақидаги айбловларни рад этди.

«Биз Эроннинг уруш иштирокчиларидан бирига қурол экспорт қилишдаги роли ҳақидаги даъволарни қатъиян рад этамиз», деди Эрон Ташқи ишлар вазирлиги матбуот котиби Носир Канани ҳафталик матбуот анжуманида.

АҚШ Эрон Россияга баллистик ракеталарни топширганидан хабар топди 

AP хабарига кўра, Қўшма Штатлар иттифоқчиларини Россияга қисқа масофали баллистик ракеталарни топшириш эҳтимоли ҳақида хабардор қилган. Вазиятдан хабардор ва анонимлик шарти билан гапирган икки агентлик манбаси қанча ракеталар ва қачон узатилгани ҳақида ҳеч қандай маълумот бермади, деб ёзди AP 8 сентябр куни.

Шундай қилиб, агентлик суҳбатдошлари Америка разведкасининг хулосаларини тасдиқладилар, дейилади қўшимча равишда. AP таъкидлаганидек, Оқ уй Эроннинг Россияга ракеталарни топширганини тасдиқлашдан бош тортди, бироқ Эрон Москвани қўллаб-қувватлашни кучайтириб бораётганидан яна бир бор хавотир билдирди. Бир неча ойдирки, Вашингтон Теҳронни баллистик ракеталарни Россия Федерациясига бермасликка чақириб келади.

АҚШ Эронни Россияга ракета беришдан бош тортишга чақирди

«Эрон баллистик ракеталарининг Россияга ҳар қандай шундай узатилиши Россиянинг Украинага қарши ҳарбий тажовузкорлигини қўллаб-қувватлаш учун кескин кучайиш бўлади», деди АҚШ Миллий хавфсизлик кенгаши вакили Шон Саветт. Унинг таъкидлашича, «бу ҳамкорлик Европа хавфсизлигига таҳдид солади ва Эроннинг беқарорлаштирувчи таъсири Яқин Шарқ ва бутун дунёдан ташқарида қандай тарқалишини кўрсатади».

Аввалроқ The Wall Street Journal ва CNN разведка манбаларига таяниб, Эрон Россияга қисқа масофага учувчи баллистик ракеталарни топширгани ҳақида хабар берган эди.

Ўз навбатида, Украина Ташқи ишлар вазирлиги бу қадам Украина-Эрон муносабатлари учун «фалокатли оқибатларга» олиб келишини таъкидлади. Айни пайтда, Теҳрон Украинадаги уруш учун Россия Федерациясига қурол берганини рад этади, худди илгари Shahed ҳужумкор учувчисиз учоқлари билан бўлган каби.