Лондон Россиянинг «соядаги нефт флоти»га қарши санкциялар киритди

Британия Россиянинг «соя флоти» – Россия нефтига нисбатан жорий қилинган санкцияларни четлаб ўтиш учун ноқонуний усулларни қўллаётган кемаларга нисбатан жазо чораларини кенгайтирди. 11 сентябр, чоршанба куни Британия ҳукумати сайтида чоп этилган пресс-релизга кўра, қора рўйхатга Россия нефтини Ғарб давлатлари томонидан белгиланган чегарадан юқори нархда ташиш билан шуғулланувчи яна ўнта кема киритилган.

Бундан буён NS Corona, NS Clipper, NS Asia, SCF Baltica, SCF Vankor, «Залив Анива», «Олимпийский проспект», «Леонид Лоза», «Владимир Тихонов» ва «Николай Зуев» каби кемалар рўйхатда бўлади. Габон ва Панама байроқлари остида сузувчи танкерларнинг оператори Stream Ship Management FZCO ҳисобланади.

Бу кемаларнинг бундан буён Британия портларига кириши тақиқланади ва миллий юк ташиш реестридан чиқарилади. Бундан ташқари, капитанлар ва лоцманлар танкерларни ушлаб туриш тўғрисида буйруқ олишлари мумкин. 

Украинани беқарорлаштиришга қаратилган ҳаракатлар

Лондонга кўра, Россия «соядаги флоти» Украинадаги вазиятни беқарорлаштириш ва бу давлат суверенитетига таҳдид солиш ҳаракатларида иштирок этмоқда. «Бугунги санкциялар Россия томонидан Британия ва «Еттилик гуруҳи» санкцияларини четлаб ўтиш, Россия нефтининг тўсиқсиз савдосини давом эттириш учун умидсиз уринишнинг бир қисми сифатида фойдаланаётган Путиннинг «соядаги флоти» кемаларига бевосита таъсир қилади», — дейилади пресс-релизда.

Лондон санкцияларига тушган кемаларни йирик қоидабузарлар деб атади ва 2022 йил февралида Россиянинг Украинага бостириб киришидан буён фақатгина «Николай Зуев», NS Asia ҳамда «Залив Анива» 5 миллиард долларлик Россия нефтини ташиганини тушунтирди. «Ҳамкорларимиз билан биргаликда биз Россияга жаҳон ҳамжамияти Украина томонида эканлиги ҳақида аниқ сигнал беришда давом этамиз ва биз бу «соядаги флот»нинг мавжудлигига тоқат қилмоқчи эмасмиз», — дейилади Британия ҳукумати баёнотида.