ЕИда бошпана сўраш бўйича янги аризалар сони бироз камайди

Жорий йилнинг биринчи ярмида Европа Иттифоқи мамлакатларида, шунингдек, Норвегия ва Швейцарияда бошпана сўраб мурожаат қилинган аризалар сони бироз камайди, аммо ярим миллиондан ошади. Январдан июн ойининг охиригача Европа Иттифоқи бошпана агентлиги (EUAA) жами 513 000 та янги аризаларни қайд этди, дея хабар беради 16 сентябр, душанба куни Малтада жойлашган Европа идораси. Бу 2023 йилнинг шу даврига нисбатан 6 мингга кам.

Мурожаатлар сони бўйича етакчи уч давлат – Германия, Испания ва Италия

Статистика Европа Иттифоқининг барча мамлакатлари, шунингдек, аъзо бўлмаган Норвегия ва Швейцариядан олинган маълумотларни ўз ичига олади. Аввалгидек, энг кўп аризалар Германияда топширилган – 124 мингга яқин, бу 29 давлат умумий кўрсаткичининг деярли чорак қисмини ташкил этади. Шу билан бирга, Германияда рўйхатга олинган қочқинлардан тушган аризалар сони ўтган йилга нисбатан 30 мингга кам бўлган.

Иккинчи ўринда Испания бўлиб, у ерда 88 минг ариза топширилган, бу ўтган йилги кўрсаткичдан деярли фарқ қилмайди. Бундан ташқари, мутлақ ҳисобда бошпана сўраб энг кўп рўйхатдан ўтган мамлакатлар учлигига Италия якун ясаб берди, у ерда 85 минг киши ҳимоя сўраб мурожаат қилган – бир йил аввалгидан учдан бир қисмга кўп. Аҳоли жон бошига ҳисобда Кипр етакчилик қилмоқда, январдан июнгача 4900 та янги аризалари рўйхатга олинди.

Мурожаатларнинг аксарияти - афғонлар ва сурияликлардан

Шу билан бирга, бошпана сўраб мурожаат қилганларнинг асосий қисмини Сурия (71 минг, 2023 йилга нисбатан 7 фоиз кўп) ва Афғонистон (45 минг, ўтган йилга нисбатан 18 фоизга кам) фуқаролари ташкил этган. Венесуэла фуқаролари 37 минг ариза топширган, уларнинг деярли барчаси - Испанияда. Статистик маълумотларда Россиянинг давом этаётган ҳарбий ҳужуми туфайли Европа Иттифоқида вақтинчалик ҳимояга эга бўлган 4,5 миллионга яқин Украина фуқаролари ҳисобга олинмаган.

Шу билан бирга, 2024 йилда бошпана сўраш бўйича биринчи босқичда ижобий қарорлар улуши 46 фоизга ошгани таъкидланади.

Миграция сиёсати кўп йиллар давомида ЕИда энг баҳсли мавзулардан бири бўлиб келган. 2023 йил охирида Европа Иттифоқи бошпана тизимидаги кенг кўламли ислоҳотни маъқуллади, бу эса ноқонуний мигрантларнинг ҳудудга киришини чеклади. Келажакда Европа Иттифоқида қолиш ҳуқуқига эга бўлиш имконияти жуда кам бўлган хорижликлар ташқи чегараларда тезкор процедурадан ўтадилар.