Apple янги iPad mini’ни тақдим этди

Қурилма 23 октябрдан сотувга чиқади.

Фото: Apple

Apple янги iPad mini’ни тақдим этди. Бу ҳақда компаниянинг расмий веб-сайтида эълон қилинди. Apple бу планшетининг охирги версиясини 2021 йилда чиқарганди.

Унинг ташқи кўринишида ўзгариш йўқ, фақат иккита янги ранг варианти пайдо бўлди: бинафша ва кўк.

Янги iPad 2023 йилда тақдим этилган iPhone 15 Pro моделларида ишлатиладиган A17 Pro процессорига эга. Шунингдек, қурилма Pencil Pro стилусини қўллаб-қувватлайди.

Қурилмадаги янгиликлардан бири Apple Intelligence сунъий интеллект функцияларини қўллаб-қувватлаш бўлди, бироқ iPadOS тизимида бу функциялар ҳозирча ишга туширилмаган.

Янги iPad mini’га олдиндан буюртма бериш нархи 128 ГБ хотирали версия учун 499 доллардан бошланади. Планшет 23 октябрдан сотувга чиқарилади.

Аввалроқ Bloomberg инсайдери Марк Гурман Apple иккита мутлақо янги қурилмани тайёрлаётганини айтганди: ақлли кўзойнаклар ҳамда камералар ўрнатилган биринчи AirPods қулоқчинлари. Таҳлилчининг фикрича, компания қурилмаларни 2027 йилгача тақдим этиши мумкин.

Бундан ташқари Гурман Apple янги қурилмаларни ҳар йили чиқаришни тўхтатмоқчилигини тахмин қилган.

#Apple #Ipad mini

Kun.uz янгиликларини Google News'да кузатинг

+ Обуна бўлиш