Айрим шахсларга темирйўл транспорти ва автобус учун бепул чипталар берилади

Ўзгалар парваришига муҳтож бўлган ёлғиз яшовчи ҳамда ёлғиз кексалар ва ногиронлиги бўлган шахслар танловига кўра темирйўл ёки шаҳарлараро автобус учун бепул чипталардан бир йилда фақат бир марта берилади.

Фото: Президент матбуот хизмати

Ҳукумат қарори билан ўзгалар парваришига муҳтож бўлган ёлғиз яшовчи ҳамда ёлғиз кексалар ва ногиронлиги бўлган шахслар реестрига киритилган шахсларга темирйўл транспортида ёки шаҳарлараро автобус учун бепул чипталар бериш тартиби тўғрисида низом тасдиқланди.

Бориш ва қайтиш учун бепул чипта олишда исталган транспорт (темирйўл ёки автобус) туридан фойдаланилиши мумкин.

Шунингдек, ўзгалар парваришига муҳтож бўлган ёлғиз яшовчи ҳамда ёлғиз кексалар ва ногиронлиги бўлган шахсларни кузатиб бораётган бир нафар шахс ҳам бориш ҳамда қайтиш учун бепул чипта олиш ҳуқуқига эгалиги белгиланди.