Google хариталардан Украинадаги ҳарбий объектлар тасвирини олиб ташлади

Google Maps хариталари янгиланганидан кейин Украинадаги ҳарбий объектларнинг сунъий йўлдош тасвирлари ошкор бўлиб қолгани тўғрисида хабар берилганди. Украина Миллий хавфсизлик ва мудофаа кенгаши қошидаги дезинформацияга қарши кураш маркази раҳбари Андрей Коваленко ҳозирда Google Maps сервисидан ҳарбий объектлар тасвирлари олиб ташлаганини маълум қилди.

«Google хариталар билан боғлиқ вазиятни тузатди. Ҳарбий объектлар ва тизимлар энди кўринмайди. Кейинчалик ҳам барчаси яхши бўлади», — дейди Коваленко.

Аввалроқ Коваленко Google вакиллари билан учрашиш ниятида эканини маълум қилганди. «Уларга Украина ҳарбий тизимлари ва объектлари тасвирларини, улар бир йил олдинги бўлишига қарамай, харитага жойлаштириш мумкин эмаслигини тушунтирмоқчиман», — деган эди у. Коваленко корпорация вакиллари билан учрашган ёки учрашмаганига ойдинлик киритмаган.

3 ноябр куни Google тасодифан Украинадаги ҳарбий объектларнинг хариталарини ошкор қилиб қўйди. Расмийнинг қўшимча қилишича, Россия нашрлари аллақачон бу суратларни «фаол тарқата бошлаган». Хусусан, Z-каналлар Google Maps иловасидан Украина ҳарбий иншоотлари хариталари скриншотларини чоп этган.

Картографик сервислар, жумладан, Google Maps турли давлатларнинг ҳарбий объектларининг сунъий йўлдошдан олинган тасвирларини хиралаштириб кўрсатади. «Медиазона»нинг ёзишича, «Яндекс.Хариталар» ҳам Россиядаги ҳарбий аэродромларнинг сунъий йўлдош тасвирларини хиралаштиришни бошлаган.