Трамп нефт компанияси раҳбарини энергетика вазири этиб танлади

Трамп АҚШ энергетика вазири лавозимига номзодини кўрсатган Крис Райт қазиб олинадиган ёқилғилар тарафдори ва иқлим инқирозини инкор этади.

Фото: Getty Images

АҚШнинг сайланган президенти Доналд Трамп энергетика вазири лавозимига Денверда жойлашган Liberty Energy нефт хизматлари компанияси асосчиси ва бош директори Крис Райт номзодини илгари сурди. Бу ҳақда Трампнинг Truth Social ижтимоий тармоғидаги саҳифасида 16 ноябр, шанба куни кечқурун чоп этилган баёнотида айтилади.

«Крис етакчи энергетика технологи ва тадбиркор. У ядро, қуёш, геотермал, нефт ва газ саноатида ишлаган. Энг муҳими, Крис Американинг энергетик мустақиллигини таъминлаган ва глобал миқёсда ўзгарган сланец инқилобини бошлашга ёрдам берганлардан бири», деб ёзган Трамп ўз баёнотида.

Қайд этилишича, Райт, агар унинг номзоди тасдиқланса, Трамп 15 ноябр куни тузилиши ҳақида эълон қилган Миллий энергетика кенгашига ҳам қўшилади. Ушбу кенгаш раиси Шимолий Дакота штати губернатори Дуглас Бергам бўлади, у аввалроқ Трамп томонидан ички ишлар вазири лавозимига кўрсатилган эди.

Тадбиркорнинг ўзи X ижтимоий тармоғида АҚШ Энергетика вазирлиги раҳбари сифатида «Америка энергиясини янада қулай, ишончли ва хавфсизроқ қилиш»га эътибор қаратишини айтди.

Трамп кичик Кеннедини ССВ раҳбари лавозимига таклиф қилди

АҚШнинг сайланган президенти Доналд Трамп собиқ мустақил номзод кичик Роберт Кеннедини соғлиқни сақлаш ва ижтимоий хизматлар (HHS) вазири лавозимига номзод қилиб кўрсатди. Трамп 14 ноябр куни Truth Social ижтимоий тармоғида тегишли хабар қолдирди.

«Узоқ вақт давомида америкаликлар озиқ-овқат саноати ва фармацевтика компаниялари томонидан оғир вазиятга дучор бўлиб келган, улар жамоат саломатлиги ҳақида гап кетганда алдаш, чалғитиш ва нотўғри маълумот беришади», деб ёзган Трамп.

«Барча америкаликларнинг хавфсизлиги ва саломатлиги ҳар қандай маъмуриятнинг энг муҳим устувор йўналишидир ва HHS барчани зарарли кимёвий моддалар, ифлослантирувчи моддалар, пестицидлар, фармацевтика препаратлари ва озиқ-овқат қўшимчаларидан ҳимоя қилишда катта рол ўйнайди», дея қўшимча қилди у.

«Кеннеди бу идораларни илмий тадқиқотлар олтин стандарти анъаналарига ва сурункали касалликлар эпидемиясини тугатиш ҳамда Американи яна буюк ва соғлом қилиш учун шаффофлик маёқларига қайтаради!» — деди республикачи.