Италиянинг Ўзбекистондаги элчиси фаолиятини якунлади

Ташқи ишлар вазири Бахтиёр Саидов Ўзбекистондаги фаолиятини якунлаётган Италия элчисини қабул қилди. Бу ҳақда ТИВ раҳбари ўзининг Telegramʼдаги каналида ёзиб қолдирди.

Қайд этилишича, Италиянинг Ўзбекистондаги фавқулодда ва мухтор элчиси Агостино Пинна билан хайрлашув учрашуви ўтказилган.

«Динамик иқтисодий ҳамкорлик, янги инвестициявий лойиҳалар, тадбиркорлар ўртасидаги яқин алоқалар ва мунтазам сиёсий учрашувлар стратегик шериклигини мустаҳкамлашга хизмат қилмоқда. Жаноб элчига мамлакатимизда фидокорона хизматлари учун Ташқи ишлар вазирлиги номидан миннатдорлик билдириб, келгуси фаолиятига муваффақиятлар тилаймиз», — деб ёзади Бахтиёр Саидов.

Агостино Пинна 2020 йилдан бери Италиянинг мамлакатдаги элчиси сифатида фаолият юритиб келаётган эди.

Аввалроқ Ўзбекистоннинг Белгиядаги элчиси Ғайрат Фозилов Нидерландияда ҳам элчи этиб тайинланган ва ушбу давлат Ташқи ишлар вазирлигининг Протокол ва қабул қилувчи мамлакат билан алоқалар департаменти директорига ишонч ёрлиқлари нусхасини топширганди.