Россия Украинадаги урушга яманликларни ёлламоқда — The Financial Times

Россия қуролли кучлари Украинага қарши урушда қатнашиш учун юзлаб яманлик эркакларни ёллади, деб ёзди Британиянинг Financial Times (FT) нашри 24 ноябр, якшанба куни. Нашрга маълумот тақдим этган яманлик янги аскарларнинг сўзларига кўра, исёнчи ҳусийчилар гуруҳи билан бевосита боғлиқ бўлган номаълум «сирли компания» уларга катта маошли иш ва ҳатто Россия фуқаролигини ваъда қилган. Бироқ Россияга келганларидан сўнг, уларни мажбуран армияга олиб кетишган ва Россия Мудофаа вазирлиги билан шартнома имзолашга мажбурлаб, урушга юборишган.

FTʼнинг тахмин қилишича, яманлик аскарларни ёллаш 2024 йилнинг июлида бошланган. Журналистлар Нижний Новгородда ёлланма аскарларни танлаш маркази раҳбари томонидан имзоланган шартномалардан бири билан танишиб чиққан. Ҳужжатда 3 июл санаси кўрсатилган. Газетанинг ёзишича, «Украинага қарши урушда асосан мажбуран жалб қилинган яманлик ёлланма аскарлар пайдо бўлиши, урушнинг чет элдан янада кўпроқ аскарларни жалб қилаётганини кўрсатади. Кремл эса тўлиқ мобилизациядан қочишга ҳаракат қилмоқда». Шунингдек, нашр Москва ва ҳусийчилар ўртасидаги «тобора мустаҳкамланаётган алоқалар»га ҳам урғу берган.

Яманликлар урушга алдов йўли билан жалб қилинмоқда

Урушга ёлланган яманликлардан бири Набил FTʼга 200 яманликдан иборат гуруҳнинг аъзоси бўлганини айтган. Улар Москвага сентябр ойида етиб келишган ва фронтга юборилган. Набилнинг сўзларига кўра, бу гуруҳдаги айримлар профессионал ҳарбий бўлган, лекин кўпчиликда ҳеч қандай тайёргарлик бўлмаган.

Набилнинг ўзини Россияда «хавфсизлик» ва «муҳандислик иши» соҳасида манфаатли иш кутиб турганини айтиб ёллашган. У Россияда ишлаб топадиган пулларини ўқишни тугатиб олишга сарфламоқчи эди.

FTʼнинг Абдуллоҳ исмли яна бир яманлик суҳбатдошига кўра, унга пилотсиз парвоз қурилмалари ишлаб чиқариладиган жойда бир марталик 10 минг долларга тенг тўлов ва ойига 2 минг доллар маош таклиф қилинган. У шериклари билан Москвага 18 сентябр куни етиб келгач, уларнинг барчасини аэропортдан тўғридан тўғри 5 соатлик масофадаги объектга олиб боришган, сўнг Украина чегарасига етказишган. Қисқа ҳарбий тайёргарликдан сўнг, уларни Ростов яқинидаги ҳарбий базага юборишган.

Абдуллоҳнинг таъкидлашича, уларни «одам савдоси билан шуғулланувчи фирибгарлар» урушга етказган. Унинг гуруҳидан кўпчилик аллақачон жангларда ҳалок бўлган.

Россияда «мажбурий ёлланма аскарлар» сони ортмоқда

Август ойи охирида Ҳиндистон парламенти депутати Викрамжит Сингҳ Саҳнейб 90 нафар ҳиндистонликнинг фирибгарлик йўли билан Россия армияси сафига ёлланганини маълум қилган. Уларнинг камида саккиз нафари ҳалок бўлган, жасадлари эса ҳозирча ватанига қайтарилмаган.

Саҳнейбнинг айтишича, Ҳиндистон фуқароларини Россияга иш таклифи билан чақиришган, сўнг таржимонсиз шартнома имзолашга мажбурлашган. 2024 йил май ойида Ҳиндистон Марказий тергов бюроси одам савдоси билан шуғулланган тўрт кишини қўлга олганини хабар қилган. Улар ёшларни «Россияда ишлайсан», деб алдаб, ёллашда гумон қилинган.

2024 йил май ойида Шри-Ланка ҳукумати ҳам фуқароларнинг Украинадаги урушга жалб қилиниши бўйича тергов бошлаган. Орол давлатининг маълум қилишича, шу пайтгача 16 киши ҳалок бўлган, 37 киши яраланган. Яна ўндан ортиқ киши асирликда бўлиши мумкин. Шри-Ланка ташқи ишлар вазири Тарака Баласурия 455 нафар фуқаро бу борада шикоят қилганини айтган.

Непал ҳукумати маълумотларига кўра, 2024 йил бошига келиб Россия армияси сафида Украинада камида 200 непаллик ёлланма аскар бўлган. Непал ташқи ишлар вазири Нараян Пракаш Сауднинг айтишича, улардан 100 нафарининг жойлашган манзили ҳозирча номаълум. Катманду Москвадан непалликларни ёллашни тўхтатишни ва уларни уйларига қайтаришни талаб қилган.