Руминияда президентлик сайловларидаги овозлар қайта саналади

Руминия Конституциявий суди Марказий сайлов комиссиясига ўта ўнг россияпараст сиёсатчи Кэлин Жоржеску энг кўп овоз олган президентлик сайловларининг биринчи босқичи натижаларини қайта ҳисоблаш мажбуриятини юклади. Бу ҳақда 28 ноябр, пайшанба куни Руминиянинг Digi24 телеканали хабар берди. Канал суҳбатдошлари таъкидлаганидек, бундай чора фирибгарлик гумонини бартараф этиш учун зарур. Шундай қилиб, овоз беришнинг биринчи босқичи натижаларини расман тасдиқлаш кейинга қолдирилди.

Президентликка икки номзод биринчи тур натижаларини бекор этишни талаб қилмоқда

Шу билан бирга, судга президентликка икки номзоддан биринчи тур натижаларини бекор қилиш тўғрисида аризалар келиб тушди. Суд Кристиан Терхешнинг апелляция аризасини қонунда белгиланган муддатдан кейин берилганлиги сабабли рад этди. Себастян Попеску топширган иккинчи аризани кўриб чиқиш 29 ноябр куни бўлиб ўтиши кутилмоқда.

Попеску Жоржескуни сайловолди ташвиқотини молиялаштириш манбаларини яширганликда ва шу тариқа ўзини «шаффоф мустақил номзод» сифатида кўрсатиб, сайловчиларни чалғитаётганликда айблади. Бундан ташқари, Попеску сўзларига кўра, Жоржескунинг TikTok платформасидаги сайловолди видеоларининг «вируслилик» кўламига фақат блогерлар ва рекламалар ёрдами билан эришиб бўлмайди. «Гап офиси Хитойда жойлашган TikTok'нинг тўғридан тўғри қўллаб-қувватлови ҳақида кетяпти», деди Попеску.

Руминиядаги сайловлар биринчи турида ўта ўнг сиёсатчи ғалаба қозонди

Мамлакат Марказий сайлов комиссиясининг 25 ноябр куни эълон қилинган расмий маълумотларига кўра, ўта ўнг ва россияпараст сиёсатчи Кэлин Жоржеску Руминияда президентлик сайловларининг биринчи босқичида энг яхши натижани кўрсатди. Сайлов бюллетенларининг 100 фоизи санаб бўлингандан сўнг, руминиялик сайловчиларнинг 22,94 фоизи Жоржеску учун овоз бергани маълум бўлди.

«Руминияни қутқариш иттифоқи»дан номзод Елена Ласкони 19,18 фоиз натижа билан иккинчи ўринни эгаллади. Учинчи ўринни 19,15 фоиз овоз билан мамлакатнинг амалдаги бош вазири, социал-демократ Марчел Чолаку эгаллади, у экзитполларга кўра ғалаба қозониши башорат қилинган эди. Миллатчи Жорже Симион 13,87 фоиз овоз билан тўртинчи ўринни эгаллади.

Сайловда мағлубиятга учраган Чолаку Руминия Социал-демократик партияси раҳбари лавозимини тарк этди.

Руминияда давлат раҳбари ташқи ва хавфсизлик сиёсатини белгилайди, қуролли кучларнинг олий қўмондони ҳисобланади ва разведка хизматларини назорат қилиш билан шуғулланади. Мамлакатда парламент сайловлари 1 декабрга белгиланган.

Сайловда жами 13 нафар номзод иштирок этди. Иккинчи тур 8 декабрда бўлиб ўтади.