Нидерландияда ички чегара назорати жорий этилади

Нидерландия ноқонуний миграцияни чеклаш мақсадида Белгия ва Германия билан ер усти чегара назоратини кучайтирди.

Қайд этилишича, 9 декабрдан бошлаб Нидерландия олти ой муддатга вақтинчалик ички чегара назоратини жорий этади. Мамлакат ҳукумати томонидан бундай қарор ноқонуний миграция ва трансчегаравий жиноятчиликка қарши курашиш мақсадида қабул қилинган.

Қўшни Белгия ва Германия билан чегарадаги исталган назорат-ўтказиш пунктида текширувлар амалга оширилиши мумкин.

Қироллик ҳарбий полицияси, шунингдек, Шенген зонасидан келадиган халқаро поездларни ҳам текширади. Аэропортларда эса фақат ноқонуний миграция ва трансчегаравий жиноятчилик нуқтаи назаридан хавф туғдириши мумкин бўлган рейслар текширувдан ўтказилади.

Нидерландияда тахминан 840 та чегара пункти мавжуд. Marver ҳарбий полиция касаба уюшмасига кўра, ҳукумат охирги 25 йилда ходимлар сонини кўп қисқартиргани боис ҳар бир назорат-ўтказиш пунктига ҳуқуқ-тартибот органлари ходимларини жойлаштира олмайди.

Касаба уюшмасининг қайд этишича, ҳарбий полиция вақтинчалик чегара назоратини таъминлаш учун фақат 50 га яқин ходимни ажрата олади, аммо чегара анча узун ва қўшимча юзлаб чегарачилар талаб этилади. Чегарадаги барча ўтиш нуқталарини тун-у кун назорат қилиш учун эса минглаб ходимлар керак бўлади.

Нидерландия ҳукумати октябр охирларида миграция сиёсатини кучайтириш тўғрисидаги янги чора-тадбирлар бўйича келишувга эришганди. Бундай чоралар қаторидан ички чегара назоратини жорий этиш, қочқинлар учун муддатсиз яшаш рухсатномалари ва уни уч йиллик ҳужжатга алмаштиришни бекор қилиш, суриялик қочқинларни Суриядаги хавфсиз ҳудудларга қайтариш ва ушбу мамлакатдан келган фуқароларнинг Нидерландияда яшашига рухсат беришни тақиқлаш, шунингдек, жиноий жавобгарликка тортилган бошпана изловчиларни депортация қилиш каби чекловлар ўрин олган.