Трамп Мексика ва Канадага АҚШ штатларига айланишни таклиф қилди

Мексика ва Канада Вашингтондан молиявий ёрдам олишни давом эттирмоқчи бўлса, АҚШ таркибига кириши керак. Бу ҳақда АҚШнинг янги сайланган президенти Доналд Трамп NBC News’га берган интервюсида маълум қилди.

«Биз Канадага ҳар йили 100 миллиард доллардан кўпроқ субсидия берамиз, Мексикага эса қарийб 300 миллиард доллар субсидия ажратамиз. Нима учун биз ушбу мамлакатларни субсидиялаяпмиз?.. Бизнинг [янги] штатимизга айланишсин», — дейди у.

Афтидан Трамп АҚШнинг ушбу икки мамлакат билан савдо баланси дефицитини назарда тутган кўринади, аммо рақамлар ошириб кўрсатилган. АҚШ Аҳолини рўйхатга олиш бюроси маълумотларига кўра, 2023 йилда Канада билан дефицит қарийб 41 миллиард долларни, Мексика билан эса 162 миллиард доллардан зиёдни ташкил этган.

Аввалроқ Трамп президентлик лавозимининг биринчи куниданоқ Канада ва Мексика ноқонуний миграция ва наркотрафикка қарши етарлича курашмаса, ушбу мамлакат товарларига 25 фоизли бож жорий этилишини маълум қилганди.

Бунга жавобан Мексика иқтисодиёт вазири Марсело Эбрард бу каби қадам АҚШда 400 минг иш ўрни қисқариши ва истеъмол нархлари ошишига олиб келишини маълум қилган. Унинг сўзларига кўра, шунингдек, Мексикада маҳсулотларини ишлаб чиқарадиган Америка компаниялари ҳам хавф остида қолади, чунки божларнинг жорий этилиши солиқларни икки баробар оширишга олиб келади. Масалан, республикада йиғилиб, АҚШда сотиладиган пикапларнинг 88 фоизининг нархи ҳар бири учун ўртача 3 минг долларга қимматлашади. Ўз навбатида Мексика президенти Клаудия Шейнбаум бундай чораларга жавоб тарзида божларни ошириш билан таҳдид қилди.

Канада бош вазири Жастин Трюдо ҳам Трампнинг баёнотига муносабат билдириб, АҚШга ўтадиган ноқонуний миграция оқимини камайтириш учун чегара назорати чораларини кучайтиришга ваъда берди. Мамлакат жамоат хавфсизлиги вазири Доминик Леблан эса бунинг учун дронлар ва вертолётлар жалб этилиши мумкинлигини таъкидлади.

Бундан ташқари, Трюдо 29 ноябр куни Трамп билан учрашиш учун унинг Мара-Лагодаги қароргоҳига ташриф буюрганди. Fox News манбасига кўра, ўшанда ҳам Американинг янги сайланган президенти Канадага АҚШнинг 51-штати бўлиш борасида ҳазил қилган.

Айни вақтда ҳар учала мамлакат ўртасида USMCA битими доирасида божсиз савдолар амал қилади — у Трампнинг биринчи президентлик муддати давомида имзоланган. Ҳужжатни қайта кўриб чиқиш эса 2026 йилга режалаштирилган.