Братиславада Украина билан бирдамлик акцияси бўлиб ўтди

Словакия пойтахтида бош вазир Роберт Фицонинг россияпараст курсига қарши ва Украинани қўллаб-қувватлаш учун митинг бўлиб ўтди. Иштирокчилар 1968 йилда совет қўшинлари Чехословакияга киритилганини эсладилар.

Фото: Radovan Stoklasa/REUTERS

3 январ, жума куни кечқурун Братиславадаги Словакия ҳукумати биносига тўрт мингга яқин одам Украинани қўллаб-қувватлаш ва бош вазир Роберт Фицога қарши норозилик билдириш учун келди, деб хабар бермоқда Словакиянинг Aktuality ахборот портали.

Акция ташкилотчиси Украина Қуролли кучлари учун ўқ-дориларга пул йиғувчи «Украина учун тинчлик» фуқаролик бирлашмаси бўлди. Намойишчилар Словакия ва Европа Иттифоқи байроқларини кўтариб олишган. Европа Иттифоқининг мадҳияси – Бетховеннинг 9-симфониясидан «Шодлик қасидаси» ижро этилди. Шиорлар орасида: «Словакия – Европа! Россия жонимизга тегди!», «Фицо, Москвага кўчиб ўт!» кабилар бор эди.

Саҳнадан сўзга чиққан мухолифатчи сиёсатчи Люсия Штасселова 1968 йилда совет қўшинларининг Чехословакияга кирганини эслади. «Мен бу давлатнинг Россиянинг сиёсий таъсири остида қолишига йўл қўймайман», деди у.

Словакиянинг эски ва янги мадҳиялари

Акция якунида 1993 йилда қабул қилинган Словакия мадҳиясининг эски версияси ижро этилди. Бу ҳам мухолифатнинг ишораси эди, чунки 1 январ, чоршанба куни Фицо бошчилигидаги мамлакат ҳукумати янги мадҳияни тасдиқлади. Маданият вазири Мартина Шимковичова у «миллий ғурурни ошириши» кераклигини айтди.

Янги версияда қўшиқ матни ва оҳанги бир хил, лекин бошқа, тантаналироқ аранжировкага эга. AFP оркестр муқаддимаси қўшилганини таъкидлаб, уни «Россия мадҳияси каби инструментал такт» деб атаган.