АҚШ Рамштайнда Украинага янги ёрдам пакетини эълон қилади

АҚШ мудофаа вазири Ллойд Остин 9 январ куни Рамштайнга боради ва у ерда Американинг амалдаги маъмурияти томонидан Украинага кўрсатилаётган сўнгги ёрдам пакетини эълон қилади, деб хабар бермоқда AP. Ҳозирча аниқ миқдор эълон қилинмаган.

Ллойд Остин Фото: Tomohiro Ohsumi/Pool Photo via AP

АҚШ президенти Жо Байден маъмурияти Пентагон раҳбари Ллойд Остиннинг Рамштайндаги Украина бўйича алоқа гуруҳида иштирок этиш учун Германияга ташрифи доирасида Киевга сўнгги ҳарбий ёрдам пакетини эълон қилмоқчи. Бу ҳақда 7 январ, сешанба куни икки юқори мартабали америкалик амалдор сўзларига таяниб, AP ахборот агентлиги хабар берди.

Агентлик суҳбатдошлари ёрдам пакетининг аниқ миқдорини айтмади ва бу «сезиларли» бўлишини таъкидлади. Айни пайтда, расмийларга кўра, у Украинага ёрдам учун Конгресс томонидан тасдиқланган маблағнинг бир қисми сифатида қолган тахминан 4 миллиард доллар миқдоридаги барча маблағни ўз ичига олмайди. Оқ уйнинг янги раҳбари Доналд Трампнинг мудофаа гуруҳи ихтиёрида «бир неча миллиард доллар» қолиши мумкин, деди АҚШ маъмурияти расмийлари Ллойд Остин билан сафарга кетаётган журналистлар учун брифингда.

Украинани қўллаб-қувватлашга жалб қилинган Пентагон расмийлари Трампнинг ўтиш гуруҳи билан «муҳим деб ҳисоблаган барча масалаларни» муҳокама қилмоқда, дея таъкидлади расмийлардан бири.

«Дронлар коалицияси» Украинага ўн минглаб УУА етказиб беради

АҚШ бошчилигидаги Рамштайн формати доирасида тузилган «дронлар коалицияси» ва «денгиз коалицияси» деб аталадиган давлатлар таркибига кирувчи йигирмадан ортиқ мамлакат 2025 йилнинг январ ойидан бошлаб Украинага ҳар хил турдаги «ўн минглаб» учувчисиз учоқлар етказиб беришни бошлайди. Бу ҳақда Буюк Британия мудофаа вазири ўринбосари Люк Поллард 19 декабр куни Лондонда Жамоатлар палатаси депутатлари олдидаги чиқиши чоғида маълум қилди, унинг сўзларини "Европейська правда" нашри келтирган.

«Тасдиқлашим мумкинки, январ ойида жиддий ўзгаришлар кутилмоқда – биз Норвегия ва Латвиядаги ҳамкорларимиз билан бирга етакчилик қилаётган денгиз ва учувчисиз учоқлар коалицияси орқали ўн минглаб дронларни етказиб беришни бошлаймиз», — дея Поллард сўзларидан иқтибос келтиради Украина нашри. «Британия ҳукумати Украина билан ҳамкорликни давом эттириб, унинг НАТОга аъзо бўлиш йўлидаги тараққиётига ёрдам беради». Расмий шунингдек, Буюк Британия «Украинага қурол-яроғ етказиб бериш суръатини ошириш ва Россия учун уруш олиб бориш харажатларини ошириш» мақсадида Рамштайн давлатлари билан ҳамкорликни давом эттираётганини таъкидлади.

Бундан ташқари, Полларднинг айтишича, 19 декабр куни эълон қилинган Украина учун янги 286 миллион долларлик (275 миллион евро) ҳарбий ёрдам пакети Буюк Британия томонидан бошқариладиган Украинага ёрдам бериш халқаро жамғармасининг 233 миллион долларини ўз ичига олади. Бу маблағлар асосий ҳарбий техника, жумладан, ҳаво ҳужумидан мудофаа тизимлари ва уларнинг таркибий қисмларини сотиб олишга, шунингдек, Украина ҳарбий-денгиз кучларининг жанговар салоҳиятини мустаҳкамлашга йўналтирилади, дея аниқлик киритади «Европейська правда».