Байден Калифорниядаги ёнғинлар сабабли охирги хорижий сафарини бекор қилди

Италияга ташриф Байденнинг президент сифатидаги сўнгги хорижий сафари бўлиши керак эди.

Фото: AP

АҚШ президенти Жо Байден Рим ва Ватиканга режалаштирилган сафарини Калифорниядаги ёнғинлар сабабли бекор қилди, деб хабар берди AP.

Италияга ташриф Байденнинг президент сифатидаги сўнгги хорижий сафари бўлиши керак эди. У 9 январ куни марҳум собиқ президент Жимми Картер хотирасига бағишланган маросимда нутқ сўзлагандан сўнг, Италияга учиб кетиши керак эди. Уч кунлик ташриф давомида Байден Италия президенти Сержо Маттарелла ва бош вазир Жоржа Мелони, шунингдек, Рим папаси билан учрашиши режалаштирилган эди.

Лос-Анжелес ҳудудида бошланган ёнғинлар бу режани ўзгартирди. Байден 8 январ куни Калифорния губернатори билан учрашиш учун Лос-Анжелесга йўл олди ва Вашингтонга қайтганидан кейин хорижий сафарини бекор қилди.

Шунингдек, Лос-Анжелесга ташрифидан сўнг Байден губернатор Гэвин Нюсом илтимосига кўра, фавқулодда ҳолат эълон қилди. Бу вақтинчалик уй-жой ва уйларни таъмирлаш учун маблағ ажратиш, шунингдек, ёнғинда жабрланганлар учун суғурталанмаган мулкий йўқотишларни қоплаш мақсадида арзон кредитлар билан таъминлаш имконини беради.

«Биз Жанубий Калифорниядаги ёнғинларни тўхтатиш ва тикланишга ёрдам бериш учун ҳамма нарсани қилишга тайёрмиз. Аммо биз биламизки, бу жуда узоқ йўл бўлади. Федерал ҳукумат сизга керак бўлган вақтгача қолиш учун шу ерда», деди Байден.

АҚШ президенти Жо Байденнинг ваколати 2025 йил 20 январ куни якунланади.