Навалнийнинг адвокатлари озодликдан маҳрум қилинди

Владимир областининг Петушинский суди ҳозирда вафот этган мухолифатчи Алексей Навалнийнинг уч собиқ адвокати — Вадим Кобзев, Алексей Липцер ва Игор Сергунинни «экстремистик ҳамжамиятда» иштирок этиш иши бўйича (Россия Федерацияси Жиноят кодексининг 282.1-моддаси 2-қисми) уч ярим йилдан беш ярим йилгача қамоқ жазосига ҳукм қилди, деб хабар берди "Медиазона" 17 январ, жума куни.

Вадим Кобзев 5,5 йил, Алексей Липцер беш йил, Игор Сергунин эса уч йил қамоқ жазосига ҳукм қилинди. Суд жараёни ёпиқ эшиклар ортида ўтди ва Владимир областининг Петушинский район судидаги эшитувлар 24 декабр куни якунланди. 10 январ куни адвокатлар сўнгги сўзларини айтишди.

Адвокатларга ҳукм 10 январ куни чиқиши керак эди, бироқ кейин у 17 январга қолдирилди. «Навалнийнинг адвокатлари устидан ҳукм 17 январ куни соат 10:00 да эълон қилинади. Навалний Россияга қайтиб келган ва қамоққа олинган кун. Менга айтинг-чи, бу тасодифми?» — деди ФБК директори Иван Жданов бу борада.

Навалний адвокатларининг иши

Кобзев, Липцер ва Сергунин 2023 йил октябр ойида Москвада ҳибсга олинган — шундан бери улар тергов ҳибсхонасида. Тергов маълумотларига кўра, Навалнийнинг адвокатлари «мақомларидан фойдаланган ҳолда» сиёсатчининг колониядан келган хатларини унинг шерикларига етказган. Шу тариқа улар «экстремистик ҳамжамият етакчилари ва аъзолари ўртасида мунтазам равишда маълумотлар узатилишини таъминлаган». 2021 йилнинг июн ойида Россия расмийлари Навалний тузилмаларини, жумладан, у асос солган Коррупцияга қарши кураш фондини ҳам шундай ҳамжамият деб эълон қилган эди.

Навалнийнинг яна икки адвокати - Олга Михайлова ва Александр Федолов ҳам «экстремистик ҳамжамият»да иштирок этиш ишига алоқадор. Улар аввалроқ Россияни тарк этгани учун сиртдан ҳибсга олинган. Барча беш адвокат экстремистлар ва террорчиларнинг Росфинмониторинг реестрига киритилган.