Украинада собиқ депутат давлатга хиёнатда айбланмоқда

Давлат тергов бюросига кўра, «Метинвест» тоғ-металлургия компанияси эгаси ва Украинанинг энг бадавлат инсонининг бизнес шериги Вадим Новинский жамиятда ҳукуматга қарши кайфиятни шакллантириш ва Россия босқинини оқлашга уриниб келган.

Фото: «РБК»

Украина Давлат тергов бюроси Олий Раданинг бир неча чақириғида депутат бўлган шахс давлатга хиёнат, диний адоват ва нафратни қўзғатишда гумонланаётганини маълум қилди.

Бюро пресс-релизида гумонланувчининг исми келтирилмаган, аммо «Украинская правда» ва «РБК-Украина» манбаларига кўра, гап олигарх Вадим Новинский ҳақида кетмоқда.

Новинский — Украинадаги энг йирик тоғ-металлургия компанияларидан бири бўлган «Метинвест» эгаларидан бири ва мамлакатнинг энг бадавлат тадбиркори Ринат Ахметовнинг бизнес шеригидир.

Давлат тергов бюроси Новинскийни «рус православ черковининг Украинадаги куратори» деб атамоқда. Тергов маълумотларига кўра, гумонланувчи 2014 йилдан бери ОАВдаги интервюлари, оммавий чиқишлари, сайти ва ижтимоий тармоқлар орқали Украинада руслар «нарративларини» тарғиб қилиб келади. Хусусан, депутат украин жамиятида ҳукуматга қарши кайфиятни шакллантириш ва Россия босқинини оқлашга уринган.

«Россияпараст депутат рус православ черкови раҳбари патриарх Кирилл Гундяевнинг кўрсатмаларини бажарган, узоқ вақт давомида у билан қалин алоқада ва унинг иэрархик бўйсунувида бўлган», — дейилади идора хабарида.

Россия томонидан Украинага қарши кенг кўламли уруш бошлангач, у депутатлик ваколатларини топшириб, чет элга кетиб қолган. Шу билан бирга, Давлат тергов бюросига кўра, гумонланувчи «Украина суверенитетига зарар етказишга қаратилган ахборот таъсирини давом эттирмоқда».