Венесуэла олти нафар америкаликни озод этди

Доналд Трампнинг махсус вакили Венесуэла президенти Николас Мадуро билан музокаралар ўтказди. Учрашув якунига кўра, мамлакатда ҳибсда сақланаётган олти нафар АҚШ фуқароси озод этилди.

Фото: Richard Grenell/AFP

АҚШ Венесуэлада ҳибсга олинган олти нафар фуқаросини ортга қайтармоқда. Бу ҳақда президент Доналд Трамп ўзининг Truth Social ижтимоий тармоғи орқали маълум қилди, деб ёзади Associated Press.

Трампнинг махсус вакили Ричард Гренелл Каракасга сафари якунлари бўйича озод этилган америкаликлар президент билан гаплашганини маълум қилди.

«Биз аллақачон йўлга чиқдик ва олти нафар америкалик билан уйга отланмоқдамиз», — деб ёзади Гренелл Х ижтимоий тармоғидаги саҳифасига. У самолёт бортида кетаётган олти кишининг суратини эълон қилган.

АҚШ президентининг махсус вакили 31 январ куни Венесуэла президенти Николас Мадуро билан музокаралар ўтказди. Венесуэла ТИВ икки томонлама муносабатлар муҳокама қилинганини билдирди. Музокаралар ўзаро ҳурмат муҳитида ўтган. Давлат департаментига кўра, ноқонуний мигрантларни Венесуэалага қайтариш ва Америка фуқароларини озод этиш масаласи муҳокама қилинган.

Доналд Трамп америкаликларнинг озод этилишидан олдин Жо Байден маъмуриятини «Венесуэладан миллион баррел нефт» сотиб олгани учун танқид қилганди. У «бундай аҳмоқликнинг такрорланишига» йўл қўймаслигини таъкидлаган.