Жей Ди Вэнс АҚШ қўшинларининг Украинага юборилиши эҳтимолини рад этди

Жей Ди Вэнс Америка қўшинларини Украинага юбориш имкониятини рад этди. Унинг айтишича, журналистлар унинг сўзларини нотўғри талқин қилишган.

Фото: REUTERS

АҚШ вице-президенти Америка қўшинларини Украинага юбориш имкониятини рад этди. «Президент Трамп энг катта келишув тузувчидир ва Украинадаги урушни тугатиш орқали минтақада тинчлик ўрнатади. Ҳар доим айтганимиздек, Америка қўшинлари Америка манфаатлари ва хавфсизлигини таъминламайдиган жойда ҳеч қачон зарар кўрмаслиги керак. Бу уруш Россия ва Украина ўртасида», деб ёзди у 14 феврал, жума куни ижтимоий тармоқда.

Шундай қилиб, Вэнс у билан аввалроқ The Wall Street Journal (WSJ) томонидан чоп этилган интервюсини рад этди, унда Россия Украина билан бу мамлакат учун узоқ муддатли кафолатлар орқали тинчлик шартномаси тузишдан бош тортса, Қўшма Штатлар Москвага қарши янги санкциялар жорий қилиши ва ҳатто Украинага ўз ҳарбийларини юбориши мумкинлиги айтилган. «Иқтисодий таъсир қилиш воситалари бор, албатта, Қўшма Штатлар Путинга қарши қўллаши мумкин бўлган ҳарбий воситалар бор», — дея Вэнc сўзларидан иқтибос келтирган журналистлар.

«WSJ менинг сўзларимни ушбу мақола учун қилганидек ўзгартиргани бемаънилик, аммо улар йиллар давомида кўпроқ америкалик ўғил-қизларини ҳарбий формада чет элга жўнатишга эришиш учун вақт сарфлаганликларини ҳисобга олсак, ажабланарли жойи йўқ», — деб жавоб берди Вэнс The Wall Street Journal нашрига.

Жей Ди Вэнс: АҚШ ва Россия ўртасида ўзгаришлар бўлиши мумкин

Америка вице-президентининг сўзларига кўра, АҚШ расмийлари президент Владимир Путинни Россия жанг майдонида эмас, балки музокаралар столида кўпроқ нарсага эриша олишига ишонтириш ниятида. Вэнс, шунингдек, тинчлик музокаралари муваффақиятли якунланса, Вашингтон ва Москва ўртасидаги муносабатлар қайта тикланиши мумкинлигини айтди.

Сиёсатчининг таъкидлашича, аввалроқ АҚШ президенти Доналд Трамп томонидан эълон қилинган Украинадаги ҳарбий ҳаракатларни тўхтатиш бўйича режалаштирилган келишув «кўпчиликни ҳайратда қолдиради». Шу билан бирга, у Трамп музокаралар давомида муайян масалалар бўйича ўз фикрини ўзгартириши мумкинлигини таъкидлади.

Бир кун аввал Пентагон раҳбари Пит Хегсет Украинага Америка қўшинларининг киритилишини рад этган эди. Шунингдек, у Украинани 2014 йилги чегараларига қайтариш реал бўлмаган мақсад эканини таъкидлади.