Курск областининг 33 нафар аҳолиси Украинадан Россияга қайтди

Курск областидан аввалроқ минтақадаги жанглар туфайли Украинага эвакуация қилинган 33 нафар тинч фуқаро Россияга қайтди. Бу ҳақда 3 март, душанба куни Россиянинг Инсон ҳуқуқлари бўйича вакили Татяна Москалкова Telegramʼда хабар берди.

Унинг сўзларига кўра, одамларнинг қайтиши Қизил Хоч ва Беларус ҳукумати воситачилигида амалга оширилган. Қайтганларнинг аксарияти кексалар. Улар орасида тўрт нафар бола ҳам бор.

Жароҳат ёки касаллик аниқланганлар Курскдаги шифохоналарга етказилган. Қолганлари қариндошлариникига олиб кетилган.

WP: Курск областининг 100 нафар аҳолиси февралда Украинага жўнаб кетди

Аввалроқ Американинг The Washington Post газетаси 2025 йил февралида Курск областининг 100 дан ортиқ аҳолиси Украина Қуролли кучлари томонидан босиб олинган ҳудудлардан Украинага жўнаб кетгани ҳақида хабар берган эди. Уларнинг аксарияти 1 феврал куни тинч аҳоли учун бошпана бўлган Суджадаги мактаб-интернатга уюштирилган ҳужумдан кейин кетишга қарор қилган.

WP маълумотларига кўра, Украина Қуролли кучлари аввалроқ Украинага кетишни сўраган россияликларнинг кичик гуруҳлари, жумладан, болалар, беморлар ва ярадорларни эвакуация қилган. Кейин Киев Москва билан уларнинг кўп қисмини Беларус орқали Россия Федерациясига қайтариш бўйича музокаралар олиб борди.