АҚШ G7 йиғилишида Россияга қарши риторикадан қочишга чақирди

АҚШ 12-14 март кунлари Канаданинг Квебек провинцияси Шарлевуа шаҳрида бўлиб ўтадиган «Еттилик гуруҳи» (G7) давлатлари ташқи ишлар вазирларининг йиғилишида Россияга нисбатан «душманлик» риторикасини қўллашнинг олдини олмоқчи. Бу ҳақда 10 март, душанба куни АҚШ давлат котиби Марко Рубио маълум қилди. «Бизнинг фикримизча, душманона риторика баъзан музокараларда низолашаётган томонларни жалб қилишни қийинлаштиради», — дея унинг сўзларини келтиради AFP.

Шу билан бирга, Рубионинг сўзларига кўра, Украинадаги урушни тартибга солишда аниқ бир томонни қўллаб-қувватлаш ҳақида гап кетмаяпти. «Катта еттилик»нинг бошқа ташқи ишлар вазирлари бошқача фикрда бўлиши мумкин, аммо ҳозирда Вашингтон музокаралар ўтказиш имкониятини таъминлай оладиган ягона томон, деди АҚШ давлат котиби.

Аввалроқ Bloomberg агентлиги «Катта еттилик» қўшма баёноти лойиҳаси бўйича музокаралар чоғида АҚШ Хитойга нисбатан сўзларни қатъийлаштириш ва Россия Федерациясига нисбатан қоидаларни юмшатишни талаб қилгани ҳақида хабар берган эди. Хусусан, Вашингтон «санкциялар» сўзини олиб ташлашни, «Россиянинг Украинага қарши уруш олиб бориш қобилияти» деган сўзни «даромад олиш» сўзлари билан алмаштиришни талаб қилди. Бундан ташқари, агентлик томонидан кўрилган асосий коммюнике лойиҳасидан Россия тажовузкорлиги ҳақидаги ҳар қандай эслатма олиб ташланди. Бунинг ўрнига матнда ўт очишни тўхтатиш бўйича келишувга эришиш учун «барча саъй-ҳаракатлар» олқишланади, деб ёзади Bloomberg.

Саудия Арабистонида АҚШ-Украина музокаралари

Марко Рубио ўз баёнотини 11 март, сешанба куни Украина ва АҚШ делегациялари ўртасида Россия ҳужумига учраган мамлакатда ўт очишни тўхтатишга эришиш режаларига бағишланган музокаралар бўлиб ўтадиган Саудия Арабистонига парвози чоғида айтди. Жиддадаги учрашув Американинг Украинага ҳарбий ёрдамини қайта тиклаш учун «муҳим аҳамиятга эга бўлади», деди АҚШ давлат котиби.

Киев АҚШ расмийлари билан музокаралар чоғида Россияга ҳавода ва денгизда ўт очишни тўхтатишни таклиф қилиши кутилмоқда, деди AFP'га исмини ошкор этмаган украиналик расмий. «Бизда осмонда ва денгизда ўт очишни тўхтатиш бўйича таклифимиз бор, чунки булар амалга ошириш ва кузатиш осон бўлган вариантлар», деди у.