ЖССТ ҳаво тозалиги стандартларига фақат 7 та давлат жавоб беради – тадқиқот

Фақат етти мамлакат Жаҳон соғлиқни сақлаш ташкилотининг (ЖССТ) ҳаводаги PM2.5 майда заррачалари бўйича рухсат этилган максимал концентрацияси талабларига жавоб беради. Энг ифлосланган шаҳарлар Марказий ва Жанубий Осиёда жойлашган. Швейцариянинг атроф-муҳит сифатини назорат қилувчи IQAir компанияси тадқиқотчилари шундай хулосага келди.

Ҳавоси энг тоза мамлакатлар қаторига Австралия, Баҳама ороллари, Барбадос, Эстония, Гренада, Исландия ва Янги Зеландия кирди, дейилади компания сайтидаги ҳисоботда. Уларда PM2.5 заррачалари миқдорининг ўртача йиллик даражаси 1 кубометр учун 5 мкг дан ошмайди.

Ҳавоси энг ифлосланган бешта давлат қаторига Чад, Бангладеш, Покистон, Конго Демократик Республикаси ва Ҳиндистон кирди. У ерда ўртача йиллик эмиссия даражаси меъёрдан 10 баробардан ортиқроқ. Энг ифлосланган ўнта шаҳардан олтитаси Ҳиндистонда. Улардан энг ифлоси мамлакат шимолидаги Бирнихат кичик саноат шаҳарчасидир. У ерда PM2,5 ўртача йиллик концентрацияси 128,2 мкг/м³ ни ташкил этган - бу меъёрдан 36 баравар юқори. Шунингдек, Ҳиндистон пойтахти Янги Деҳли дунёдаги энг ифлосланган пойтахт ҳисобланади.

Россиянинг энг ифлосланган шаҳарлари бешталигига Владивосток, Каменск-Шахтинский (Ростов вилояти), Рязан, Красноярск ва Реутов (Москва вилояти) кирди.

Таҳлилчилар Океанияни дунёдаги энг тоза ҳудуд деб эътироф этди. У ерда ўнта шаҳардан олтитаси (57%) ҳавонинг ифлосланиш даражаси бўйича ЖССТ стандартларига жавоб беради. Дунё миқёсида PM2.5 ўртача йиллик концентрацияси шаҳарларнинг атиги 17 фоизида стандартга жавоб беради. Шу билан бирга, таҳлилчиларнинг қайд этишича, айрим мамлакатларда атроф-муҳит мониторинги тизими етарли эмас. Мисол учун, Африкада ҳар 3,7 миллион кишига битта станция тўғри келади.