Европарламентда АҚШдан Озодлик ҳайкалини Францияга қайтариш талаб қилинди

Доналд Трамп маъмуриятининг қарорлари АҚШ эркинлик тарафдори эмаслигини кўрсатади, дейди франциялик евродепутат.

Фото: AP / Mark Lennihan

Европарламент аъзоси Рафаэл Глюксман АҚШ расмийларидан Озодлик ҳайкалини Францияга қайтаришни талаб қилди. Ҳозирги маъмурият ва АҚШ президенти ўз қарорлари билан эркинлик қадриятлари уларга яқин эмаслигини кўрсатмоқда. Сиёсатчининг 17 март, якшанба кунги нутқидан парчаларни AFP агентлиги келтирган.

Украинани фаол қўллаб-қувватлаётган Глюксманн ўз нутқида Вашингтонни Москвага яқинлашаётгани учун қоралади. Унинг сўзларига кўра, Қўшма Штатлар «золимлар томонига ўтишга қарор қилган». Француз сиёсатчиси, шунингдек, Доналд Трамп маъмуриятини илмий эркинлигини таъкидлаган олимларни ишдан ҳайдагани учун ҳам танқид қилди.

Шу муносабат билан Европарламент депутати АҚШни Озодлик ҳайкалини қайтаришга чақирди. «Биз уни сизга бердик, лекин сиз уни менсимаяпсиз», деди у америкаликларга мурожаат қилиб.

Озодлик ҳайкали Францияда ҳайкалтарош Огюст Бартолди раҳбарлигида яратилган. У французлар америкаликларни қўллаб-қувватлаган Америка инқилобий урушининг 100 йиллиги шарафига Франциянинг АҚШга совғаси эди.

46 метр баландликдаги мис ҳайкал 1886 йилда Ню-Йоркдаги Озодлик оролида очилган. Бир вақтлар яқин атрофдаги Эллис-Айленд оролида Қўшма Штатларга киришни кутган миллионлаб муҳожирлар учун у яхшироқ ҳаётга умид рамзи эди, дея таъкидлайди AFP.

Трамп АҚШ Гренландияни қўшиб олишига ишоняпти

Америка Қўшма Штатлари Гренландияни аннексия қилади, Доналд Трампнинг бунга ишончи комил. 13 март куни Оқ уйда НАТО бош котиби Марк Рютте билан учрашувда АҚШ президенти оролнинг аннексия қилиниши мумкинлиги ҳақидаги саволга «Ўйлайманки, шундай бўлади», деб жавоб берди. «Бизга бу (Гренландия) халқаро хавфсизлик учун керак», деб тушунтирди Трамп. У, шунингдек, Рютте Гренландиянинг АҚШга қўшилишида «муҳим рол» ўйнашига ишонч билдирди.

Ўз навбатида, Марк Рютте «НАТОни бу масала бўйича муҳокамаларга тортмоқчи эмаслигини» айтди, лекин Россия ва Хитойнинг ушбу минтақага қизиқиши ортиб бораётганлиги сабабли Арктика хавфсизлиги учун Гренландия муҳимлигини тан олди.

Гренландияни ўз ичига олган Дания парламентининг мудофаа қўмитаси раиси Расмус Ярлов ўзининг Х ижтимоий тармоғидаги саҳифасида АҚШнинг оролга даъволари «икки НАТО давлати ўртасида урушга» олиб келиши мумкинлигини ёзди ва Марк Рюттенинг Трамп билан учрашувдаги хатти-ҳаракатларини ҳам танқид қилди. «Гренландия Даниядан дарҳол мустақилликка қарши овоз берди ва ҳеч қачон Американики бўлишни хоҳламайди», дея қўшимча қилди Ярлов.

#АҚШ #Озодлик ҳайкали