АҚШ собиқ президенти Кеннеди ўлими билан боғлиқ махфий ҳужжатлар ошкор этилди

Қўшма Штатларда собиқ президент Жон Кеннедининг ўлдирилиши билан боғлиқ тахминан 80 минг саҳифадан иборат ҳужжатлар махфийликдан чиқарилди.

Кеннеди ўлдирилиши билан боғлиқ мингдан ортиқ ҳужжат АҚШ Миллий архивлар ва ҳужжатлар бошқармаси веб-сайтига жойлаштирилди ва оммага тақдим этилди.

Аввалроқ, терговга оид ҳужжатларни ўрганган таҳлилчилар эълон қилинган материалларда инқилобий янгилик бўлиши эҳтимолдан йироқ эканини айтишган эди.

23 январ куни Трамп собиқ президент Кеннедининг ўлдирилиши билан боғлиқ тергов ҳужжатларини махфийликдан чиқариш тўғрисидаги фармонни имзолади.

Шунингдек, буйруқ нафақат Кеннедининг ўлдирилиши, балки унинг укаси Роберт Кеннеди ва Мартин Лютер Кингнинг ўлдирилиши билан боғлиқ барча ҳужжатларни ҳам ошкор қилинишини назарда тутади.

АҚШ президенти Доналд Трамп ҳужжатларнинг махфийликдан чиқарилишини эълон қиларкан, одамлар буни «ўнлаб йиллар давомида кутишганини» таъкидлаган эди.

АҚШ 35-президенти Жон Кеннеди 1963 йил 22 ноябрда Далласда (Техас штати) ўлдирилган. У очиқ лимузинда кетаётиб, милтиқдан ўқ еб, ҳалок бўлди. Расмий тергов қотил Ли Ҳарви Освалд эканини эълон қилди, у ёлғиз ҳаракат қилгани айтилди. Бироқ, бу жиноятда бошқа шахслар ёки гуруҳларнинг иштироки ҳақида кўплаб фитна назариялари мавжуд. Кеннеди ўлими билан боғлиқ тергов ҳужжатлари узоқ муддатга махфийлаштирилган эди.