Танзанияда улкан дарахтларнинг янги тури аниқланди

Кения, Танзания ва Италиядан бўлган халқаро ботаниклар гуруҳи Танзаниянинг шарқидаги Удзунгва тоғли ўрмонларида улкан дарахтларнинг янги турини топди. Унга Tessmannia princeps номи берилди. Тадқиқот натижалари Phytotaxa илмий журналида эълон қилинди.

Олимлар унинг нозик оқ гулбарглари ва учларида сариқ тугунлари бўлган ғайриоддий гулларига эътибор қаратган. Барг ва ёғоч намуналари таҳлил қилингандан сўнг, бу илгари илм-фанга маълум бўлмаган янги тур экани тасдиқланган.

Princeps (лотинча «мислсиз») номи дарахтнинг улкан ўлчамлари сабаб танланган: у тропик ўрмондаги бошқа ўсимликлардан баланд бўлиб, жуда катта диаметрга эга.

Тадқиқотчилар қайта ташриф давомида 100 га яқин шундай дарахтларга дуч келган. Табиий сабабларга кўра қулаб тушган дарахтларнинг биридан эса ёғоч намуналари олинган. Таҳлил натижалари баъзи дарахтлар 3 минг ёш эканини кўрсатган.

Tessmannia princeps жуда секин ўсиши билан ажралиб туради: танасининг айланаси атиги бир сантиметрга кенгайиши учун дарахтга 15 йилгача вақт керак бўлади. Бу эса уни ташқи таъсирларга нисбатан, айниқса, заиф қилади.

Олимларнинг таъкидлашича, бундай турдаги дарахтларни ҳимоя қилиш учун минтақада инсон фаолиятини қатъий назорат остига олиш зарур.