Қамчиқда Hyundai минивэни хандаққа қулади

Ҳайдовчи ФВВ ходимлари томонидан қутқариб қолинган, унга зарар етмаган, автомобилда ундан бошқа одам бўлмаган.

Фото: Видеодан кадр

Қамчиқ довонида Hyundai автомобили хандаққа қулаб тушди. Фавқулодда вазиятлар вазирлигининг хабар беришича, ҳайдовчи А373 автомобил йўлининг «Тошкент—Водий» йўналишида ҳаракатланиб келаётган бўлган. У бошқарувни йўқотиб, йўл четидаги тўсиққа урилган ва уни кесиб ўтиб хандаққа тушиб кетган.

Бу ҳақида «Қамчиқ» махсус-қидирув, ёнғин-қутқарув бошқармасига хабар келиб тушганидан сўнг қутқарув отряди зудлик билан воқеа жойига борган ва ҳайдовчини қутқариб олган. Сўнг махсус техникалар ёрдамида автомобил хандақдан олиб чиқилган.

Таъкидланишича, автомобилда ҳайдовчидан бошқа ҳеч бўлмаган ва у жароҳат олмаган.