Саудия Арабистони Суриянинг Жаҳон банки олдидаги қарзини тўлаб бермоқчи

Саудия Арабистони Суриянинг Жаҳон банки олдидаги қарзларини тўлашни режалаштирмоқда, деб хабар берди Reuters.

Суриянинг ташкилотдан қарийб 15 миллион доллар қарзи бор, банк узоқ давом этган фуқаролар урушидан жабр кўрган мамлакатни қайта тиклаш ва бошқа ёрдам кўрсатиш учун грантларни маъқуллашдан олдин уни тўлаш керак.

Суриянинг янги расмийлари хорижий валюта тақчиллигини бошдан кечирмоқда ва хориждаги музлатилган активлар ёрдамида қарзларни тўлаш бўйича илгари ишлаб чиқилган режа амалга оширилмаган, деб хабар беради икки манба. Reuters манбалари, шунингдек, Жаҳон банки расмийлари мамлакат электр тармоғини тиклаш ва бюджет сектори ходимларига иш ҳақини тўлашни қўллаб-қувватлаш учун маблағ ажратиш масаласини аллақачон муҳокама қилганини айтди.

Апрель ойи охирида Сурия делегацияси Жаҳон банки ва Халқаро валюта жамғармасининг (ХВЖ) йиллик йиғилишларида қатнашиш учун Вашингтонга боради. Бу Сурия расмийларининг ўтган декабрь ойида Башар Асад режими ағдарилганидан кейин АҚШга илк расмий ташрифи бўлади. Аввалги ҳукумат даврида АҚШнинг Сурияга нисбатан жорий қилган деярли барча санкциялари ўз кучида қолмоқда.

Саудия Арабистони илк бор Суриянинг янги маъмуриятига молиявий ёрдам кўрсатишга тайёрлигини билдирди, деб ёзди Reuters. Саудия Арабистони молия вазирлиги вакили Ар-Риёзнинг Сурия қарзларини тўлаш режалари ҳақидаги маълумотни на тасдиқлади, на инкор этди. Март ойида Қатар электр тақчиллигидан азият чекаётган Сурияга Иордания орқали газ етказиб бериш режасини эълон қилган эди. Бу ҳаракат Вашингтон томонидан маъқулланган.