Евроиттифоқ фаластинликларга ёрдам учун 1,6 млрд евро ажратди

Европа Иттифоқи Ғарбий соҳил ва Ғазо секторида яшовчи фаластинликларга ёрдам бериш учун 1,6 миллиард евро ажратади. Бу ҳақда 14 апрел, душанба куни Европа Иттифоқининг ташқи ишлар ва хавфсизлик сиёсати бўйича олий вакили Кая Каллас маълум қилди.

«Биз Фаластин халқини қўллаб-қувватлашимизни кучайтирмоқдамиз. 2027 йилгача бўлган 1,6 миллиард евро Ғарбий соҳил ва Ғазо минтақасини барқарорлаштиришга ёрдам беради. Европа Иттифоқи зарур инфратузилмага сармоя киритади, шу билан бирга қочқинларга гуманитар ёрдам ва кўмак кўрсатади. Биз Фаластин маъмуриятининг узоқ йиллик ҳамкоримиз», — деб ёзди Каллас ижтимоий тармоқда.

Унинг хабари Люксембургда Фаластин миллий маъмурияти бош вазири Муҳаммад Мустафо ва Европа Иттифоқи ташқи ишлар вазирлари ўртасидаги учрашув арафасида эълон қилинди. Каллас ёрдам Ғазо секторига қандай етказилишига аниқлик киритмади. Фаластин миллий маъмурияти фақат Иордан дарёсининг ғарбий соҳилини назорат қилади. Ғазо секторидаги ҳокимият 2007 йилда Ҳамас гуруҳи томонидан назоратга олинган.

АFP эслатганидек, Европа Иттифоқи Фаластин маъмурияти учун энг йирик халқаро донор ҳисобланади. 1,36 миллиард евролик олдинги уч йиллик ёрдам режаси 2021 йилдан 2024 йилгача давом этган.