NASA’нинг икки аёл астронавти ХКС бортидан очиқ космосга чиқди

Улар 6,5 соат давомида Халқаро космик станцияда ташқи монтаж ишларини амалга оширди.

Фото: NASA

Америкалик астронавтлар Энн Макклейн ва Никол Айерс 1 май куни Халқаро космик станция (ХКС) бортидан очиқ космосга чиқиб, ташқи монтаж ишларини амалга оширди.

Аёл астронавтлар ХКСнинг Quest шлюз камерасидан космик вакуумга чиққан ва улар қарийб олти ярим соат давомида очиқ космосда бўлган.

Қайд этилишича, бу 1998 йил охирларида фойдаланишга топширилган ХКС бортидан экипажнинг ҳисоб бўйича 275 марта очиқ космосга чиқиш ҳисобланади.

Астронавтлар космик станциянинг алоқа антеннасини бошқа жойга кўчириши ва шу йил охирида SpaceX’нинг Cargo Dragon юк кемаси орқали станцияга етказиладиган қўшимча кучли IROSA қуёш батареялари учун монтаж кронштейнларини ўрнатиши керак.

IROSA’нинг энг биринчи қуёш панеллари 2021 йил июн ойида очиқ космосга чиққан уч нафар астронавт томонидан ўрнатилган эди. Иккинчи ва учинчи жуфтликлар эса 2022-2023 йиллар давомида ўрнатилган.

Саккизта қуёш панели станция функционаллигини таъминлашда керак бўладиган электр энергиясини 30 фоизга кўпроқ генерация қилиш имконини беради. Улар эски панеллар ёнига ўрнатилади. Натижада, станция энерготизими қуввати 160 дан 215 киловаттагача ошади.

NASA’га кўра, ХКСдаги эски саккизта қуёш панели ҳам ҳозирча яхши ишламоқда, аммо уларнинг хизмат кўрсатиш муддати 15 йилга мўлжалланган. Бу турдаги панелларнинг биринчиси станцияга 20 йилдан ошиқроқ вақт олдин ўрнатилган эди.

#ХКС #очиқ космос