Reuters: Ғарб Киевга Patriot тизимларини етказиб беришни муҳокама қилмоқда

Украинанинг ғарбдаги иттифоқчилари Киевга қўшимча узоқ масофага мўлжалланган Patriot комплексларини етказиб бериш масаласини муҳокама қилмоқда ва 24-25 июнь кунлари Гаагада бўлиб ўтадиган НАТО саммитигача бу борада келишувга эришмоқчи. Бу ҳақда 5 май, жума куни манбага таяниб, Reuters агентлиги хабар берди.

Апрель ойида Украина президенти Володимир Зеленский CBS News телеканалига берган интервьюсида унинг ҳукумати Америкада ишлаб чиқарилган 10 та ҳаво мудофаа тизимини сотиб олишга тайёрлигини айтди.

Кейинроқ Зеленский Рим папаси Францискнинг дафн маросими бўлиб ўтган Ватиканда АҚШ президенти Доналд Трамп билан бу масалани муҳокама қилганига аниқлик киритди.

Reuters манбаларидан бирига кўра, Қўшма Штатлар ва Греция дастлаб қўшимча тизимларнинг потенциал етказиб берувчилари қаторида бўлган. Афина кейинчалик ёрдамда иштирок этишни рад этди.

«Украинага Грециядан Patriot тизимларини етказиб бериш масаласи кўриб чиқилмаяпти», деди расмийлардан бири.