Полша 10 мингта Warmate камикадзе дронларини сотиб олади

Полша ўз армияси учун 10 мингга яқин Warmate камикадзе дронларини харид қилиш бўйича шартнома имзолади. Бу ҳақда мамлакат мудофаа вазири Владислав Косиняк-Камиш маълум қилди.

Қайд этилишича, шартнома республиканинг қуролланиш бўйича агентлиги ва WB Electronics ишлаб чиқарувчиси ўртасида тузилган.

Мудофаа вазирининг сўзларига кўра, WB Electronics — учувчисиз учиш қурилмаларини ишлаб чиқариш бўйича Европадаги энг яхши компания. Косиняк-Камиш, шунингдек, дронларнинг замонавий ҳарбий можаролардаги инқилобий ролини қайд этиб ўтди.

Таъкидланишича, келишув 2035 йил охиригача давом этади ва кейинги битимлар доирасида мингга яқин дрон тўпламларини, жумладан, энг янги версияларини етказиб беришни назарда тутади.

Полша армияси 2017 йилдан бери Warmate дронларидан фойдаланиб келмоқда, ўшанда ҳудудий мудофаа қўшинлари учун кичик партияларни етказиб бериш бўйича биринчи шартнома тузилган эди. 2022 йилда эса қуролланиш агентлиги компания билан тахминан 12,5 миллион долларлик иккинчи шартномани тузганди.