РФга қарши санкцияларнинг 17-пакети: нишонда яна танкерлар

Европа Иттифоқи Россияга қарши санкцияларнинг 17-пакетини тасдиқлади. Санкциялар асосан РФнинг “соядаги флоти” танкерларига қаратилган. Шунингдек, Россия ҳарбий заводлари учун таркибий қисмларни етказиб бериш ёки санкцияларни айланиб ўтишга кўмаклашишда айбланаётган компанияларга нисбатан ҳам чекловлар киритилди.

{Yii::t(}

Ўтказиб юбориш 6s

Ўтказиб юбориш

Россия Украинани босиб олишга ҳаракат қилаётганига жавобан киритилган санкцияларнинг янги пакети – Кремл учун нефт сотишни янада қийинлаштириш ва санкцияларни глобал занжирлар орқали “айланиб ўтишга” уринишларни жиловлашга қаратилган кескин чора сифатида кўрсатилмоқда.

Европа Иттифоқининг ташқи ишлар ва хавфсизлик масалалари бўйича олий вакили Кая Калласга кўра, Россиянинг “соядаги флоти” деярли 200 та танкерни ўз ичига олади. Москва бу танкерлардан нефт экспортига қўйилган чекловлардан қисман қочиш учун фойдаланяпти. Бу кемаларнинг реал эгаси, яъни юрисдиксияси аниқ эмас, байроғи тез-тез ўзгартирилади, шунингдек, суғуртаси бор-йўқлиги ҳам номаълум.

17-санкциялар пакети эса Россия нефт савдосининг яширин тармоғи, трейдерлар, суғуртачилар ва порт инфратузилмаси орқали ишлашни мураккаблаштиради. Бу чоралар Хитой, Ҳиндистон ва Африкага экспортни издан чиқариши мумкин.

Европа Иттифоқи 31 та компания нисбатан иккиламчи санкциялар ҳам жорий қилмоқда. Бу рўйхатда Ўзбекистонда рўйхатдан ўтган битта фирма (Trade Engine System) ҳам бор. Санкцион рўйхатга қўшилган ширкатлар Россия ҳарбий комплексини бевосита ёки билвосита қўллаб-қувватлаган ёки санкцияларни айланиб ўтиш занжирларида иштирок этганликда айбланган.

Санкциялар G7 кун тартибида эмас

Сўнгги йилларда Еттилик гуруҳи йиғилишларида Россияга қарши санкциялар муҳокама қилиниши одатий ҳолга айланганди. Бу сафарги G7 молия раҳбарлари учрашуви эса афтидан ноодатий тус олади: унда олтита давлат биргалашиб, АҚШ молия вазири орқали Трампдан ҳатто дўстларга ҳам бож солиш ҳақидаги таҳдидларини бас қилишни сўраши мумкин.

Еттилик гуруҳига кирувчи давлатлар: АҚШ, Канада, Британия, Франсия, Германия, Италия ва Япония молия вазирлари ва марказий банк раислари 20–22 май кунлари Канаданинг Банф йиғилмоқда. Расмий баёнотларга кўра, улар глобал иқтисодиёт, иқтисодий хавфсизлик ва барқарорлик, Украинадаги вазият, молиявий жиноятлар ва сунъий интеллект масалаларини муҳокама қилмоқчи. Норасмий хабарлар эса учрашувдаги бош мавзулардан бири – Трампнинг дунё иқтисодиётини беқарорлаштираётган савдо сиёсати бўлишидан дарак бермоқда.

Трампнинг қайтиши ортидан Еттилик гуруҳи ичида келишмовчиликлар кучайган. “Бу одатдаги G7 эмас”, дейди Вашингтонда жойлашган Атлантика кенгаши ақл маркази директори ўринбосари Аная Кумар. Айни пайтда Япония ва Европа давлатлари АҚШ томонидан божларнинг икки баробар оширилиши хавфи остида, Канада эса ҳали ҳам Трампнинг 25 фоизлик тарифлари билан курашяпти.

Таҳлилчиларга кўра, бу сафарги учрашув G7даги сиёсий уйғунлик эмас, балки ички зиддиятлар фонида ўтмоқда. Молия раҳбарларидан кейин, июн ойида Катта еттилик давлат раҳбарларининг саммити ҳам бўлиб ўтади.