"Челси" Англия кубогини тарк этди, Диего Коста рақибни тишлагани учун майдондан четлатилди

Англия кубогининг чоракфиналида "Эвертон" ўз майдонида 2:0 ҳисобида "Челси"ни мағлубиятга учратди ва мусобақанинг яримфиналига йўл олди. 2-бўлимда "ирисчалар" сафида "Челси"нинг собиқ ҳужумчиси Ромелу Лукаку дубль амалга оширди. Бельгиялик футболчи 77- ва 82-дақиқаларда ўз ҳисобига гол ёзиб қўйди.

Учрашувда иккала жамоанинг ҳам биттадан ўйинчиси майдондан четлатилди. Аввал лондонликлар ҳужумчиси Диего Коста учрашувнинг 84-дақиқасида рақиби Гарет Барри билан тўқнашувда унинг бўйнидан тишлагани учун қизил карточка олиб, майдонни тарк этди. 3 дақиқа ўтиб "жабрдийда" Баррининг ўзи ҳам иккинчи сариқ карточка учун майдондан четлатилди. 

Энди Роберто Мартинес шогирдлари яримфиналда 13 мартда "Олд Траффорд" стадионида бўлиб ўтадиган "Манчестер Юнайтед" — "Вест Хэм" жуфтлиги ғолиби билан учрашади.

Англия кубоги. Чоракфинал

Эвертон – Челси – 2:0

Голлар: Лукаку, 77 (1:0); Лукаку, 82 (2:0).

Огоҳлантиришлар: Джагелка, 42; Барри, 84 – Коста, 11; Фабрегас, 62.

Четлатиш: Барри, 87 – Коста, 84.