Австралияда қуёш батареялари ўрнатиладиган машиналар серияли ишлаб чиқарилади

Австралиянинг Clenergy Team Arrow компанияси қуёш батареясидан қувват олувчи пойга прототипини ишлаб чиқди. Фирма раҳбарияти бу машинанинг серияли русумини конвейерга қўйишни режалаштирмоқда. 

Модель Arrow STF деб номланган. Унинг илк намойиши 8-15 октябрь кунлари Австралияда ташкил этиладиган 3000 километрлик World Solar Challenge марафонида бўлиб ўтади. Унда, фақатгина қуёш батареясидан қувватланувчи машиналаргина қатнаша олади. 

Arrow STF моделига иккита электр двигатель ўрнатилган бўлиб, уларнинг от кучига ойдинлик киритилмаган. Моторлар ҳаракатланиш учун қувватни қуёш батареялари энергиясини тўпловчи литий-ион аккумуляторидан олади. Автомобилга ўрнатилган қуёш элементлари майдони 5 метр квадратни ташкил этади. 

Arrow STF машинаси шаҳар шароитида минг километрдан ортиқроқ масофани босиб ўта олади. Магистрал йўллардаги тезликда ҳаракатланса, 300-400 км масофани ортда қолдиради. Зарурат бўлганда, хўжалик электр тармоғидан ҳам қувватланиши мумкин. 

Ишлаб чиқарувчининг таъкидлашича, STF моделининг аэродинамик самарадорлиги, ҳозирда мавжуд автомобилларникидан юқоридир. 

Ҳозирча, Arrow STF серияли тарзда ишлаб чиқарилиши номаълум бўлса-да, Clenergy Team Arrow компаниясида маълум қилишларича, улар модель учун бир неча буюртма қабул қилишган. Бундан ташқари, компания сайтида онлайн буюртма бериш имкони ҳам мавжуд. 

ABC.net.au хабар беришича, бу машинанинг бир нусхаси 250 минг доллар атрофида бўлади. Бироқ, автомобилга совутгич ўрнатилиши даргумон.