Америкалик адмирал АҚШнинг янги эсминецини Бэтмен кемасига қиёслади

АҚШ ҳарбий-денгиз кучлари таркибига энг янги ракета эсминеци Zumwalt киритилди. Бу билан боғлиқ тантанали маросим 15 октябрда бўлиб ўтди. Маросимда АҚШ Тинч океани қўмондонлиги раҳбари адмирал Гарри Харрис ҳам иштирок этди. У ўз нутқида Zumwalt’ни Бэтмен кемасига қиёслади. Бу ҳақда ABC News хабар бермоқда. 

"Агар Бэтменда ҳарбий кема бўлганда, у Zumwalt бўларди", деб айтди Харрис.

"Бизнинг президент ва америка халқида хавфсизликка чанқоқлик бор экан, менда бу хавфсизликни таъминлайдиган нарсаларга очофатларча иштаҳа бўлади", деб қўшимча қилди Харрис.   

АҚШ ҳарбий-денгиз кучлари вазири Рэй Мабус янги кемани АҚШнинг ҳарбий-денгиз кемалари орасидаги "улкан сакраш" деб атади. Унинг айтишича, бу кема янги имконият ва тизимларга эга бўладиган янги синфдаги кемаларнинг биринчиси бўлади.

Янги кеманинг оғирлиги 15 минг тоннага яқинни ташкил қилади. Уни қуриш учун 4,4 млрд доллар сарфланган. Эсминец Иккинчи жаҳон ва Вьетнам урушлари қаҳрамони, адмирал Элмо Зумвалт номи билан аталган.