Москва хиёбонларидан бири Ўзбекистон биринчи Президенти шарафига номланади

Ўзбекистоннинг Москва шаҳри марказидаги консуллиги ва меҳмонхонаси яқинида барпо этилган хиёбонга Ўзбекистон Республикаси биринчи Президенти Ислом Каримов номи берилади. Якиманка туманидаги хиёбон Большая Полянка кўчасидаги 39-уй ва Казачье 1-тор кўчасидаги 13-уй оралиғида жойлашган, деб хабар қилмоқда Москва шаҳри сайти. 

Россия ва Ўзбекистон фан, сиёсат ва санъат намояндалари консуллик яқинидаги номсиз хиёбонга Ислом Каримов номини бериш ташаббуси билан Россия пойтахти раҳбариятига мурожаат қилишган. Хабарда ёзилишича, Москва шаҳри маъмуриятининг 1 ноябрдаги мажлисида мазкур ҳиёбонга Ўзбекистоннинг биринчи Президенти номини бериш масаласи ҳам муҳокама этилиши кутилмоқда.