Европарламент фракцияси раҳбари: ЕИда Туркия учун жой йўқ

Туркия Европа Иттифоқига аъзо бўла олмайди. Бу ҳақида Европарламентнинг христиан демократлар фракцияси раҳбари Манфред Вебер "Neue Osnabrücker Zeitung" газетасига берган интервьюсида маълум қилди. 

"ЕИда Туркия учун жой йўқ", - деди немис сиёсатчиси. У  Анқара билан иқтисодиёт, маданият ва талабалар алмашинувига доир ҳамкорлик битимларини алоҳида имзолаш мақсадга мувофиқлигини қўшимча қилди. 

Европарламент пайшанба куни Страсбургда бўлиб ўтган ялпи мажлисда Туркиянинг блокка аъзолигига доир музокараларни  тўхтатишга чорловчи резолюцияни тасдиқлади. Бу Анқарада катта муҳокамага сабаб бўлди. Туркия бош вазири Бинали Йилдиримнинг сўзларига кўра, ҳужжат мамлакат учун ҳеч қандай юридик кучга эга эмас.