Россиялик мухолифатчи Россия президенти лавозими учун курашиш истагини билдирди

Фото: tass.ru

Россиялик мухолифатчи Алексей Навальний 2018 йилда Россия президенти лавозими учун курашиш истагини билдирди. Сиёсатчининг бу борадаги видеомурожаати унинг номзодини президент лавозимига илгари суриш бўйича кампания сайтида жойлаштирилди.

"Бир йилдан сал кўпроқ вақтдан кейин мамлакатимизда президент сайловлари бўлиб ўтади. Мен унда иштирок этиш борасида узоқ ўйладим ва иштирок этишим ҳақидаги хулосага келдим. Мен Россия президенти лавозими учун курашда иштирок этаман", деб айтган Навальний.

Мухолифатчининг фикрича, бу қарор бутун мамлакат ва "ҳар бир аниқ одам", жумладан унинг ғояларини қўллаб-қувватламайдиганлар учун ҳам фойдали бўлади. Навальнийнинг айтишича, у сайловчиларга давлатни ривожлантиришнинг муносиб дастурини таклиф қилишга тайёр.

Бир ой аввал Россия Олий суди президиуми Навальнийга қарши "Кировлес" иши бўйича айблов ҳукмини бекор қилиб, иш материалларини Киров судига қайта кўриб чиқиш учун юборган. Шу тариқа, ушбу иш бўйича ҳозирча мухолифатчи сайловда иштирок этиш бўйича ҳуқуқи чекланмаган.

Айни вақтга келиб "Яблоко" партиясининг собиқ етакчиси Григорий Явлинский ҳам президент сайловларида иштирок этиш истагини билдирган.

#Россия #президент сайловлари #Алексей Навальний