Трамп Facebook, Google ва Microsoft раҳбарлари билан учрашди

АҚШнинг сайланган президенти Дональд Трамп Facebook, Amazon, Google, Microsoft ва бошқа етакчи IT-компаниялари раҳбарлари билан учрашди, деб хабар қилмоқда The Guardian.

Мулоқот Трампнинг Нью Йоркдаги бош қароргоҳида бўлиб ўтган. Сиёсатчининг баёнотига кўра, унинг мақсади – ушбу компанияларнинг ишларини муваффақиятли олиб боришига ёрдам беришдир. 

«Бу ерда расман бўйсуниш мажбурияти йўқ», – деган Трамп ва топ-менежерларни ўз одамлари ва ўзига бемалол мурожаат қилишга чақирган. Бундан ташқари, сайланган президент халқаро савдодаги чекловларни олиб ташлашга ваъда берган. 

ОАВ ходимлари кўп соатлик учрашувнинг дастлабки 4 дақиқасини кузатишга рухсат беришган. Трамп қароргоҳига, хусусан, Google асосчилари Сергей Брин ва Ларри Пейж, Microsoft раҳбари Сатья Наделла, Facebook амалий директори Шерил Сэндберг, Cisco раҳбари Чак Роббинс, Apple бош директори Тим Кук ташриф буюрган.

Twitter раҳбари Жек Дорси учрашувда қатнашмаган. Турли хабарларга кўра, унинг таклиф қилинмагани Трампнинг Дорсидан ўзига хос қасос олишидир. Дорси Трампнинг сайловолди кампаниясида #CrookedHillary (эгилган, қийшиқ Ҳиллари) хэштегини жойлаштиришдан бош тортган эди.